Хи далоран белхаш чекхбовларна леринчу гIуллакхехь дакъалецира Нохчийн Республикин Куьйгалхочо Кадыров Рамзана.
Юьртан бахархошна хьалха къамел деш, Республикин Куьйгалхочо билгалдаьккхира ламанан ярташкара Iер-дахаран хьелаш, доцуче хи далош, некъаш тодеш, де-дийне даларца кхин а толург хилар. Цо иштта баркалла элира йоццачу хенахь ламанан халачу хьелашкахь хи далоран белхаш вовшахтохарехь дика къахьегначу шен гIоьнчина Хататаев Амхьадна, Нажи-Юьртан кIоштан адаминистрацин куьйгалхочунна Гарбаев Iабдул-Керимна, берриге белхалошна а.
Бинарг кIезиг болх бац. Дагадаийта лаьа, 2014-гIа шо чекхдолуш, 26-чу декабрехь, Нохчийн Республикин Куьйгалхочун пресс-конференцехь «Грозный» телеканалан журналиста, Зандакъа юьртан вахархочо Шамсуддинов Эзер-Iелас довзийтира шайн юьртара хица доьзна хьал. Цул тIаьхьа дукха хан ялале, нийсса аьлча, Керлачу шеран 1-чу дийнахь дIаболийра хинан биргIа йилларан белхаш. Де-буьйса ца лоьруш, мел шийла де хиларх ца сацош, 16 дийнахь къахьийгира 100 гергга стага. Атта дацара лаьмнийн даккъашкахула, хьаннашкахула, Iаннаш хедош, 15 км. йохалла хинан биргIа йилла. Январан 17-чу дийнахь, Республикин Куьйгалхочо билгалйинчу хенал дикка хьалха, вай лакхахь билгалдина ма-хиллара, дIадаьхьира хи юьрта кхачорна лерина гIуллакх. ХIинца дуьйна дIа юьртахойн таро ю дууш-молуш Яьсси-хих пайдаэца. Оцу гIуллакхах баккхийбина а ца бовлу зандакъой. Берриге а юьртахойн цIарах Нохчийн Республикин Куьйгалхочунна Кадыров Рамзанна цо динчу беркатечу гIуллакхана даггара баркалла элира Шамсуддинов Эзар-Iелас.
Хь.АБАЕВ