Нохчийн Республикин Куьйгалхочун Кадыров Рамзанан дIадолорца нийса а догIуш, товбецан (сентябрь) беттан 29-чу дийнера эсаран (октябрь) беттан 4-гIа де кхаччалц Гуьмсерчу Россин спецназан университетехь дIахьур ду ТIеман бIаьхаллин 45 гIалина юкъара дуьххьарлера тIеман-патриотизман «Вайн ницкъ – цхьааллехь» аьлла долу ловзар.
Оцу мероприятехь дакъалаца тарло Нохчийн Республикин Куьйгалхочо Кадыров Рамзана а, Россин субъектийн губернаторша а, иштта, ТIеман бIаьхаллин гIаланийн куьйгалхоша а, мэраша а.
Ловзарехь дакъалоцуш хир ю ТIеман бIаьхаллин гIаланашкарчу 16-17 шераш долчу кегийрхойх лаьтташ йолу тобанаш (хIора а тобанехь 10 декъашхо а волуш). Оцу вовшахтоьхначу тобанашна юкъара кегийрхой ТIеман бIаьхаллин гIаланашкахь дIадаьхьанчу лерринчу ловзаршкахь, къовсамашкахь билгалбаьхна.
I-III-гIий меттигаш къовсарехь тобанаша гойтур ду герз нийса тохарехь а, граната кхоссарехь а, тIеман кхидолчу дакъошкахь а долу хаарш. Иштта, царна юкъахь дIаяхьа лерина тIеман историн викторина а ю.
ТIеман-патриотизман ловзаран дакъалацархой тергонехь латтош хир бу Россин спецназан университетан говзанчаш.
Толамаш баьхьначу тобанашна ТIеман бIаьхаллин гIаланийн союзан а, Соьлжа-ГIалин мэрин а, ВОВ-н коьртачу музейн а цIарах долу дипломаш а, кубкаш а лур ю. Иштта, ерриге тобанашна ловзарехь дакъалаьцна хиларан тоьшаллаш а, мехала совгIаташ а лур ду.
ТIеман-патриотизман ловзар Соьлжа-ГIалин 200 шо кхочуш хиларна лерина ду. Иза чекхдаьллачул тIаьхьа, Соьлжа-ГIалахь дIахьур ю ТIеман бIаьхьаллин гIаланийн конференци.
Шуьйрачу хаамийн гIирсашна аккредитаци:
Электронни почта: chechen-media@mail.ru, номер: +7(928)787-40-62.