Латарийн «Ахмат» клубан векал Чакаев Ахьмад хIокху деношкахь дIаяьхьначу паргIатчу кепехь латарехула йолчу дуьненан чемпионатан 65 кийлане кхаччалц йолчу йозаллин категорехь дуьненан чемпион хилла.
Чакаевс 5 латар дIадаьхьира, царах 4 латарехь Европин а, дуьненан а, Олимпийски ловзарийн а чемпионашна тIехь толамаш бехира цо, ткъа цхьана латарехь ийшира, оццу йозаллин категорехь хинволчу чемпиона толам а боккхуш.
Билгалдаккха деза, А.Чакаев Россин уггаре тоьллачу латархойх цхьаъ хилар. 2016-чу шарахь дIаяьхьначу дуьненан чемпионатера йоьзан а, 2017-чу шарахь дIаяьхьначу Европин чемпионатера дато а совгIаташ деана цо, ткъа хIинца рогIера кхин цхьа совгIат а даьккхина.
«Уггаре хьалха оцу кхиамца Нохчийн Республикин Куьйгалхо, Россин Турпалхо Кадыров Рамзан декъалво оха. Баркалла ала лаьа цунна, цо вайн спортсменашна гIо-накъосталла а, тидам а барна. Оха декъалво Чакаев Ахьмад лаккхара совгIат даккхарца. Иштта совгIаташ цо кхин а дуккха а дохийла а лаьа тхуна. Тхо тешна ду, Чакаевс шен гIалаташна тIехь болх бийриг хиларх», – яздина Спортан латаран федерацин а, республикин латарийн «Ахмат» клубан а инстаграмерчу агIонашкахь.
I.ТЕРЛОЕВ
№82, шинара, эсаран (октябрь) беттан 30-гIа де, 2018 шо