Дукха хан йоццуш хаза кхаъ кхаьчна «Даймохк» газетан редакце.
2018-чу шеран эсаран (октябрь) беттан 23-чу дийнахь хиллачу кхеташонехь Устрада-ГIалин депутаташа гIалин цхьана урамна вайна массарна езаш, евзаш йолчу Нохч-ГIалгIайн Республикин культурин хьакъйолчу белхахочун, Нохчийн Республикин хьакъйолчу журналистан, радиодикторан Эльмурзаева Розин цIе тилларан хьокъехь сацам тIеэцна.
И хаам мерза кхаъ хилла дIахIоьттина вайн махкахошна.
60 шо сов хан ю Эльмурзаева Розас нохчийн радиохь хьанала къахьоьгу. Цуьнан дерриге а дахар къеггина масал ду Нохчийн Республикин шуьйрачу хаамийн гIирсашкахь тахана къахьоьгуш болчу кегийрхошна.
Устрада-ГIаларчу денна гIишлош алсамъюьйлучу керлачу микрорайонехь бу Эльмурзаева Розин цIарах урам.
А.ГАЗИЕВА
№89, шинара, лахьанан (ноябрь) беттан 27-гIа де, 2018 шо