Нохчийн Республикин Юкъараллин палатехь дIаяьхьира карарчу шеран дуьххьарлера кхеташо.
Даханчу шеран жамIаш шо чекхдолуш дина хиллехь а, тахана юха а карладохуш хьахийра царах цхьадерш. БIаьрлачу кхиамашца, тIедехкина декхарш дуьззина кхочушдарца бирзина 2018-чу шарахь Юкъараллин палато бина болх.
Карарчу шарахь а, тIейогIучу хенахь а кхочушдан дезаш керла декхарш лаьтта Юкъараллин палатин белхахошна а, декъашхошна а хьалха. Уьш а дийцаре дира кхеташонехь. Палатин берриге а болх тIехьажийна хила беза юкъараллина пайде хиларна.
«ДIадахана шо мел лаккхарчу кхиамашца вай дерзийнехь а, кхидIа вайн болх ледара хила ца беза, вайн паргIат Iен йиш яц. Мелхо а, кхин а жигарабаккха безаш бу вай болх. Мелла а дукха адамаш хила деза вайн тергонехь, царах доккхах долу дакъа яртийн бахархой хила а беза», – билгалдаьккхира шен къамелехь Юкъараллин палатин Председатела Денильханов ИсмаьIала.
Шайн рогIехь бистхиллачу кхеташонан дакъалацархоша довзийтира шаьш дан дагалаьцнарг а, кхочушдан билгалдинарг а.
ПЕТИРОВА ПетIамат
№3, кхолламан (январь) беттан 15 де, 2019 шо