Нохчийн пачхьалкхан хьехархойн университетан искусствон факультетан хьехархоша, художникаша Соьлжа-ГIалин махлелоран-садаIаран «Гранд Парк» туьшахь хьехархойн а, студентийн а суьртийн гайтам схьабоьллуш, мастер-классаш а гайтира.
Цигахь дакъалоцуш вара Нохчийн пачхьалкхан хьехархойн университетан ректор Халадов Хож-Ахьмад, гайтаман искусствон кафедрин доцент, Нохчийн Республикин хьакъволу художник Пашаев Абу, оццу кафедрин лакхара хьехархо Мутусханов Ислам, искусствон факультетан студенташ.
– Дукхахболчу кегийрхошна культура бохург илли алар, хелхар дар бен дац моьтту. Ткъа «культура» дош доккха маьIна долуш ду. Цо шена чулоцу иллеш а, хелхарш а санна, вайн къоман гIиллакх-оьздангалла, духар, куьйгаговзалла, искусство, иштта дIа кхин а. Вайн республикин Куьйгалхочо, Россин Турпалхочо Кадыров Рамзана нохчийн культура ларьярехь а, тIекхуьучу чкъуранна иза йовзийтарехь а деш долу гIуллакхаш шен семачу тидамехь латтош ду. Иштта, вайн къоначарна культурин искусствон цхьа дакъа а довзуьйтуш, вовшахтоьхна оха рогIера мероприяти. Ткъа иза дIаяхьа Соьлжа-ГIалин махлелоран-садаIаран уггаре а йоккха «Гранд Парк» туш харжар а шен цхьа Iалашо йолуш дара. Леха а ца оьшуш, я кхайкха а ца оьшуш дуккха а нах хуьлу кхузахь, къаьсттина кегийрхой. Тхан кечамаш чекх а бовлале схьагулбелира дуккха а нах, шайна юкъахь дуккха а кегийрхой а болуш. Боккхачу лаамца дакъалецира цара тхан мероприятехь, – дийцира Халадов Хож-Ахьмада.
Искусствон факультетан хьехархоша мастер-классаш гайтира, цул сов, шайн белхан цхьайолу къайленаш а яьстира. Гуш дара кегийрхошна искусство езаш хилар а, иза йовза лууш хилар а.
Хьовсархоша-эскперташа лаккхара мах хадийра шайна хьалха дехкинчу суьртийн.
Иштта, Х-А.Халадовс билгалдаьккхира университето хIокху тайпа цхьаьнакхетарш республикин ерриге а шахьаршкахь а, кошташкахь а дIахьуриг хилар.
ВЕГИЕВА Макка
№11, чиллин (февраль) беттан 12 де, 2019 шо