Нохчийн литературин исбаьхьчу хьаьттахь, шатайпанчу башхаллица къаьсташ беркате майда ю Борхаджиев Хож-Баудин поэзи. Масех книга ю цуьнан зорбане яьлла. Поэзехь къахьегна Iаш вац иза. Доза доцуш шуьйра ю цуьнан кхоллараллин таронаш. Дукхах болчу вайн махкахошна санна футбол езаш ву Хож-Бауди. «Терек» футбольни командин кхиамех язйина книга ю цуьнан, «Терек. Восхждение к Кубку» цIе йолуш.
Нохчийн Республикин культурехь долу хьал а дика девза Хож-Баудина. 2005-чу шарахь дара «Культура Чечни. Испытание временем» цIе йолу книга вовшахтоьхна, Борхаджиевс зорбане яьккхича. Шен цIийца, ойланца, вахаран кепаца журналист ву Хож-Бауди. «Гумс» газетан коьрта редактор а ву. Цхьана муьрехь Борхаджиев Нохчийн Республикин Журналистийн союзан председатель а вара. Делахь а, цуьнан коьрта болх а, синхьаам а поэзи бу. 70 сов иллина дешнаш яздина поэта. Вайн махкахь бевзачу иллиалархоша а, эшаршлакхархоша а мукъаме ерзийна, шолгIа дахар делла цуьнан байташна. Уггаре а хьалха цIе яккха луур дара Ахмадова Аминин, Гадаев Валидан, Каримов Ринатан, Бисултанов Тимуран. Ишта дуккха а кхиболу артисташ а бу Хожбаудин дешнаш тIехь иллеш дIаолуш. Даймахках, ненах, безамах ду цуьнан дешнаш тIехь даьхна иллеш. Журналистийн гимн а язйина поэта. Цхьабосса говза яздо цо нохчийн маттахь а, оьрсийн маттахь а. Бакъволу поэт санна даима дог къона лаьтташ ву Хож-Бауди. Бакъдерг дийцича иза ханна дукха воккха вац. ХIинцца гIеметтахIоьттина стаг ву. Адамаллех юьззина тайна амал а ю цуьнан. Иза массаьрца ийна ву, даима а велавелла-векхавелла ву. Накъосташна оьшучохь орцахвала кийча а ву. Ишта сирла поэзи а ю цуьнан. Даима дикане кхойкхуш, кханенах дегайовхо чIагIъеш, дешархойн дог-ойла иркарахIоттош. Нохчийн литературехь шена хьакъ йоллу меттиг дIалоцу Борхаджиев Хож-Баудин кхолларалло. ЦIера Гуьмсера велахь а, ерриге а Нохчийчоь шен дагчу лаьцна вехаш илланча ву иза. Вайн ирсечу дахаран зевне аьзнаш тосало поэтан поэтически могIанашкахь. Цундела вайна маьIне хета цо яздина хIора дош а. Самукъадаларца ладугIу цуьнан дешнаш тIехь даьхначу иллешка. ЦIенчу даггара сатуьйсу керлачаьрга.
А.ДАЧАЕВА