Нохчийн пачхьалкхан фольклоран иллийн а, хелхаран а «Нохчо» ансамблан коллективо дакъалоцур ду Ерригроссин халкъан искусствон II-чу фестивалехь. Цигахь шайн хьуьнар, говзалла гойтур ю Россин пачхьалкхан тоьллачу академически хораша.
Фестивалан гурашкахь дIахьош йолчу «Танцуй и пой, моя Россия» программа, Россин хелхаран а, иллиаларан а тоьллачу коллективаша дакъа а лоцуш дIахьур ю.
Фестиваль лерина ю иллийн, музыкин, хелхаран меттанашкахь Россин халкъийн барт чIагIбарна а, къоман культурин сий лакхадаккхарна а.
И санначу фестивалашкахь артистийн вовшашна бовзар хуьлу, зеделлачух пайдаэца дика аьтто а болу. Хелхаран а, хоран а искусство кхиорна боккха тIеIаткъам бо фольклоран иллийн а, хелхаран а коллективийн фестивалаш дIаяхьаро.
Кремлехь дIахьур ю фестиваль. Кремлан Дворецан сцени тIехь эзар сов артист, илланча, музыкант цхьаьнакхетар ву.
Нохчийн Республикин векал хилла цига йоьдучу «Нохчо» ансамбло хьовсархошна ши номер гойтур ю: «Нохчийн кеп» а, «Нохчийчоь» а.
Карарчу хенахь ансамблан солисташ репетицеш еш бу. Цара бечу кечаме хьаьжира Нохчийн Республикин культурин министр Дааев Хож-Бауди. Кегийрхойн дог-ойла гIаттош, уьш йохье бохуш, дош элира цо.
Вай сатуьйсур ду «Нохчо» ансамблан керлачу кхиамашка.
З.ЯХЪЯЕВА
Суьрта тIехь: Нохчийн Республикин культурин министр «Нохчо» ансамблан репетицехь
№23, бекарг (март) беттан 26 де, 2019 шо