Республикин хIорашеран «Синмехаллаш» телепроектан конкурс-фестивалан хьалхарчу туран рогIера ловзар дIадаьхьира Невран кIоштарчу Керла Солкушино юьртарчу культурин цIийнехь.
Устрада-ГIалин Культурин урхаллин белхахойн тоба а, Соьлжан кIоштан Культурин отделан тоба а яра рогIерчу ловзаршкахь дакъалоцуш.
Нохчийн халкъан иллиаларан а, нохчийн гIиллакхаш гайтаран а, хIинцалерчу заманахь нохчаша лелош долу гIиллакхгIуллакх гайтаран а, кхин а масех номинацешкахула постановкаш гайтира шина а тобано.
Жюрин декъашхой республикин культурин, искусствон хьакъболу белхахой бара.
Хьовсархойн могIаршкахь бара Устрада-ГIалин мэрин а, Соьлжан кIоштан администрацин а векалш, Невран кIоштара бахархой а.
Шина а тобано дика кечамаш бинера. Хьовсархойн а, жюрин декъашхойн а дагахкхеташ, нохчийн гIиллакхийн хазалла гойту сценкаш гайтира цара. Нохчийн иллиаларан а, хелахардаран а номинацешкахь а кегийрхоша шайн говзалла гайтира.
Конкурсан чаккхенехь жюрис довзийтира команданаша яьхначу баллийн юкъара жамI: Устарда-ГIалин Культурин белхахойн тобанан 111 бал яра, Соьлжан кIоштан Культурин отделан белхахойн 122 бал яра.
Толамхоша дакъалоцур ду шолгIачу турехь.
М.ВЕГИЕВА
№51, мангалан (июль) беттан 9 де, 2019 шо