Нохчийн Республикин дешаран а, Iилманан а министр Байханов ИсмаьIал цхьаьнакхийтира информатикин а, ИКТ-н а декъехула Пачхьалкхан цхьааллин экзамен дIаяла кечамбаран кIирандийнан дешаран проектан дакъалацархошца, школин лакхарчу классийн дешархошца.
Министерствон пресс-службин хаамашца, дешаран 2018–2019-чуй шерашкахь Соьлжа-ГIалин Дешаран туьшахь дIахьош ду кхушарахьлера выпускникаш информатикин а, ИКТ-н а экзаменна кечбаран гIуллакх. Республикин тайп-тайпанчу кIошташкарчу школийн дешархоша дакъалецира цигахь.
Проектехь дакъалаца заявкаш чуелларш компьютерни зерех чекхбевлира, цул тIаьхьа йолу тестировани кехат тIерчу тIедахкаршца йира Соьлжа-ГIалин пачхьалкхан мехкадаьттан техникин университетан прикладни хаамийн технологин институтехь.
ХIокху шарахь Пачхьалкхан цхьааллин экзамен информатикин а, ИКТ-н а декъехула дIаяла лаам хилларг республикин дешаран 154 организацера 400 дешархо вара.
Экзаменна кечамбарехь дакъалаьцначу дешархойн Пачхьалкхан цхьааллин экзаменан дика жамIаш, лакхара баллаш хуьлуш хилар билгалдаьлла.
Дагадаийта лаьа информатикин а, ИКТ-н а декъехула Пачхьалкхан цхьааллин экзаменна кечамбаран проект Нохчийн Республикин дешаран а, Iилманан а министерствос Соьлжа-ГIалин пачхьалкхан мехкадаьттан техникин университетаца цхьаьна 2016-чу шарахь дуьйна дIахьош хилар.
КIирандийнан дешаран курсашкахь дакъалоцу 11-чу классийн дешархоша а, хьехархоша а. Цигахь оцу предметехула шайн хаарш алсамдаьхна ца Iаш, экзамен дIаяларан низамах дерг а девза царна.
З.ХИЗИРОВА
№53, мангалан (июль) беттан 16 де, 2019 шо