Нохчийн Республикин Куьйгалхочо Кадыров Рамзана ВКонтакте социальни сетерчу шен агIонехь яздина дIадаханчу кIиранах нохчийн халкъана боккха иэшам хилла хиларх – бакъдуьнена вирзина Шелан кӀоштан чоьхьарчу гӀуллакхийн отделан хьаькам Мусаев Тамерлан.
Р.Кадыровс билгалдаьккхира иза чIогIа майра бIаьхо а, дика куьйгалхо а хилла хилар, бахархойн паргIато а, кхерамазалла а ларъярехь цо къахьегна хилар.
«Россин а, Нохчийчоьнан а иштта дика кIентий дагахь латто а, церан сий дан а, царах лаьцна дерг тIаьхьенаша тIаьхьенашна довзийта а декхарийлахь ду вай. Цундела, Мусаев Тамерланан цӀарах керла маьждиг дан сацам хилла тхан, Курчалойн кӀоштарчу Майртуьпахь, иза винчу юьртахь. Цу хьокъехь ас хаам бира суо цуьнан тезета ваханчу хенахь», – дийцира республикин Куьйгалхочо.
ХIокху деношкахь Мусаев Тамерланан цIарах долу маьждиг дан долийначу майданахь хилира Кадыров Рамзан шен накъосташца а, Майртуьпарчу бахархошца а цхьаьна.
Цу дийнахь, оцу майданахь гулбеллачара зуькарш а дира, иштта, Нохчийн Республикин муфтис Межиев Салахь-Хьаьжас циггахь маьждигана бух буттуш, цу буха капсула йиллира.
Керла маьждиг 5 эзар стагана лерина а, Нохчийчохь даьржинчу архитектурин ламасталлин куц-кепехь а хир ду.
А.ГИРИХАНОВА
№57, мангалан (июль) беттан 30 де, 2019 шо
Дала маьждигаш ма эшдойл вайна. Кхин мелл дерга-м лалурдар, маьждигаш хилчхьанна.