14 млн. сом зен хилла нохчийн энергетикашна
Нохчийн энергетикашна, бахархоша а, тайптайпанчу организацеша а ток лечкъорца доьзна, 14 млн. сом зен хилла карарчу шарахь. Карарчу шеран чекхбаьллачу 7 баттахь 641-зза гучудаьлла ток лечкъор – 4,8 млн. кВт с. я 13,8 млн. соьмана.
Энергетикаша хаам ма-барра, «Чеченэнерго»-н говзанчашна гучудаьлла 457 меттехь (7,4 млн. соьмана зен), лоруш а йоцуш, ток лечкъор а, иштта, 214 меттехь (6,4 млн. соьмана зен), энергетикашца бина барт а боцуш, токах пайдаэцар а.
Ток лечкъоран буха тӀехь гулйина материалаш бакъонашларъяран органашка дӀаелла.
ГIирсаш дIахIиттош бу «Казбек» технопаркехь
Шелан кӀоштахь ечу «Казбек» технопаркехь дӀахьош бу гӀирсаш дӀахӀитторан а, нисбаран а белхаш. Оцу Ӏалашонца республике баьхкина бу «WEHRHAHN» компанин белхахой. Технопаркехь мел хир йолчу процессашна программаш нисъярехь а, автоматика хӀотторехь а къахьоьгу цара.
Берриге а белхаш чекхбевллачул тӀаьхьа, «Казбек» технопарк 4 заводах лаьтташ хир ю.
Карарчу хенахь, оцу 4-ннах 1 завод болх беш ю – кира баккхаран завод ю юьйцург.
Эсаран (октябрь) беттан 5-чохь кхин а 1 заводо болх дӀаболор бу – ГӀишлошъяран декъехь лелочу декъачу иэдарийн завод.
Гепатит цамгар ерш уггаре а кIезиг бу Нохчийчохь
Россин Федерацин могашаллаӀалашъяран министерствос бинчу хаамца тӀаьхьарчу 5 шарахь гепатит цамгар кхеттарш 130 эзар стагана алсамбевлла Россехь – 2018-чу шарахь и цамгар 1 млн. сов стагана яра Россехь.
Оцу цамгарца бала хьоьгуш болу бахархой уггаре а кӀезиг бу Липецкан областехь, ГӀалмакхойчохь, Нохчийчохь, ткъа уггаре а дукха – Чукоткин, Ямалийн-Ненцийн автономийн округашкахь а, Магаданан областехь а.
Иштта сурт хӀоттадо Россин Федерацин могашаллаӀалашъяран министерствос арахецначу статистикин гуларехь.
И.ИСЛАМОВ
№64, хьаьттан (август) беттан 27 де, 2019 шо