Невран кIоштахь, «Моздок – ГIизлара» автомобилийн новкъахь, Макне-ГIала а, Савельевски а ярташна юккъехь, «ВИС» автомашенахь вогIуш хиллачу Мирни юьртан вахархочо шен автомашен тIетоьхна 46 шо долчу зудчунна.
Хиллачу чевнех зуда циггахь кхелхина.
Грозненски кIоштахь ши автомашен вовшах а кхеташ, некъан-транспортан бохам хилла: «Соьлжа-ГIала – Шуьйта» автомобилийн некъан 9-чу километрехь, Шинасуьйра-Юкъ юьрта чувулуччохь, вовшахкхетта «Камаз–780401» а, «Фольксваген Поло» а автомашенаш.
Автомашенашна урхалла деш хилла 1968-чуй, 1996-чуй шерашкахь вина волу республикин ши вахархо.
Некъан-транспортан бохамехь лазийна «Фольксваген Поло» автомашенан водитель. Иза Соьлжа-ГIалин клиникин больнице вигна, цигахь цунна медицинин гIо дина.
Иштта, Соьлжа-ГIалин Старопромысловски кIоштахь вовшахкхетта «Лада-Гранта» а, «ВАЗ–21112» а автомашенаш.
Бохам хилла «Лада-Гранта» автомашенан водителан бехкенна. Иза, хьалха а ваьлла, дуьхьалбогIучу новкъа ваьлла, урхаллица лара а ца вина, цо шен автомашен «ВАЗ–21112» автомашенна тIетоьхна.
Некъан-транспортан бохамехь лазийна 1977-чуй, 1995-чуй шерашкахь вина волу Грозненски кIоштан ши вахархо Соьлжа-ГIалин клиникин больнице вигна.
Оцу некъан-транспортан бохамийн бахьанаш а, дакъалацархойн бехкан барам а къастош бу.
Таллам дIахьош бу.
I.АДЛАНОВ
№64, хьаьттан (август) беттан 27 де, 2019 шо