Карарчу 2019-чу шарахь Россин спецназан университето (РУС) тIеман дукхаIалашонийн «Чаборз М–3» 8 багги йина Россин Федерацин Къоман гвардин хьашташна. Иштта хаам бина «Чаборз» юкъараллин коьртачу директора Сирык Александра.
«Таханлерчу дийнахь «Чаборз» юкъаралло кечйина «Чаборз» баггин модификацин 3 кеп ю – М–3 а, М–4 а, М–6 а. ХIокху шарахь Россин Федерацин Къоман гвардин хьашташ кхочушдеш, «Чаборз М–3» модификацин 8 багги йина оха», – билгалдаьккхина цо.
Бахархошна а, нуьцкъаллин а, бакъонашларъяран а органашна а еш йолу дукхаIалашонийн автомобилаш ю «Чаборз» баггеш.
«Чаборз» юкъараллин коьртачу директора билгалдаккхарехь, бахархошна а, бакъонашларъяран а, нуьцкъаллин а структурашна а еш йолу баггеш башхаллаш йолуш ю – модификацица а, конструкцица а, мехаца а.
Нохчийн Республикехь еш а, арахоьцуш а ю «Чаборз» баггеш.
Нуьцкъаллин а, бакъонашларъяран а структурашна лерина модификацеш хIинцале а зийна Арктикерчу шелонехь а, шашлахь а, иштта, Шемарчу йовхонехь а, гIамаршлахь а.
Билгалдаккха догIу нуьцкъаллин а, бакъонашларъяран а структурашна ечу модификацеш тIехь пулеметаш хилла ца Iаш, АГС–17 я АГС–30 гранатометаш а хуьлуш хилар.
И.ХАСАХАНОВ
№65, хьаьттан (август) беттан 30 де, 2019 шо