Карарчу хенахь 52 маьждиг ду Нохчийчохь деш. Царах 12 маьждиг рузбанан хир ду, ткъа кхидерш – жамаӀатан. Иштта хаам бина Нохчийн Республикин бусалбанийн динан урхаллин векалша.
Царах 3 маьждиг пхиппа эзар стагана лерина хир ду. Соьлжа-ГӀаларчу Мичуринан цIарахчу поселкехь а, Курчалойн кӀоштарчу Майртуьпахь а, Шелан кӀоштарчу Эвтарахь а деш ду и маьждигаш.
Цул сов, Гуьмсан кӀоштарчу Гезлой-Эвлахь деш а ду 2 эзар стагана лерина маьждиг.
Билгалдаккха догӀу и маьждигаш Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин цӀарахчу Юкъараллин гӀоьналлин фондан чоьтах деш хилар.
Иштта, хууш ма-хиллара, тIаьхьарчу пхийтта дийнахь республикехь 2 маьждиг схьадиллина: хьаьттан беттан 23-чу дийнахь Шелахь а, оццу беттан 31-чу дийнахь ГаланчIожахь а.
Курчалойн кIоштарчу Майртуьпахь деш долу маьждиг некъан бохамехь кхелхинчу Шелан кIоштан чоьхьарчу гIуллакхийн декъан куьйгалхочун Мусаев Тамерланан цIарах хир долуш хилар а дагадаийтина Нохчийн Республикин бусалбанийн динан урхаллехь.
Цу тIе, муфтиятехь хаам ма-барра, билгалдаьхначу маьждигашна юкъахь дац некъашца деш долу ламазан цIенош – уьш а ду республикин кIошташкахь иттаннашкахь деш.
И.АДАМОВ
№67, товбецан (сентябрь) беттан 6 де, 2019 шо