Абу-Дабин тӀаьхьалонан элица, Ӏаьрбийн Цхьаьнатоьхначу Эмиратийн эскаран Коьртачу буьйранчин заместительца шайх Мухьаммад бен Зайд аль-Нахайянца цхьаьнакхийтира Нохчийн Республикин Куьйгалхо.
Цигахь дийцаре дира Нохчийчоьнан а, Ӏаьрбийн Эмиратийн а вовшашца йолу зӀенаш кхидӀа а чIагIъяран хьокъехь долу гӀуллакх.
Кадыров Рамзана билгалдаккхарехь, и зӀенаш экономикин а, культурин а, спортан а, дешаран а дакъошкахь ю.
Цул сов, тидамза ца йисира гӀараяьлла йолу UFC242 турнир а.
Иштта, наной буьйцуш, шайх Мухьаммад бен Зайд аль-Нахайяна хаийтира шайн нанна Кадыров Рамзан шен кӀант санна везаш а, цо иза чӀогӀа лоруш а хилар.
Цу тӀе, Несин Айманин могашалла хаьттина ца Ӏаш, цуьнга маршалла дӀадалар а дийхира Абу-Дабин тӀаьхьалонан элас.
Ткъа Нохчийн Республикин Куьйгалхочо, шен декъехь, Несин Айманис а маршалла даийтина хилар – шайх Мухьаммад бен Зайд альНахайяне а, цуьнан нене шайха Фатима Мубарак аль-Кетбига а, Iаьрбийн Цхьаьнатоьхначу Эмиратийн халкъе а.
Оцу цхьаьнакхетарх лаьцна ВК чуьрчу шен агIонехь Кадыров Рамзана билгалдаьккхина шайх Мухьаммад бен Зайд аль-Нахайянца ша воккхахволу ваша санна лоруш хилар.
Нохчийчоьнан Куьйгалхо шайн махка вогIуш хилар а, цуьнан а, шен кIентан а цхьаьнакхетар хирг хилар а хиъначу шайха Фатима Мубарак аль-Кетбига, ша кеч а бина, шайн къоман кхача баийтинера Кадыров Рамзанна.
Иза, Iаьрбийн Iадаташца дуьстича, тIехбоккха ларам болчу хьешаца хIоттош долчу гIиллакхан цхьа дакъа ду.
И.АДАМОВ
№68, товбецан (сентябрь) беттан 10 де, 2019 шо