Соьлжа-ГӀалин дуьненаюкъара университет
2015-чу шеран хIутосург (май) беттан чаккхенехь Соьлжа-ГIалахь Iаьрбийн Цхьаьнатоьхначу Эмираташкарчу «ЕМААР» компанин президентаца Мухьаммад Аль-Аббарица Нохчийн Республикин Куьйгалхочо Кадыров Рамзана дIадаьхьначу цхьаьнакхетарехь хиллачу бартаца нийса а догIуш, карарчу хенахь вайн республикин пачхьенехь еш ю Дуьненаюкъара университет.
Дуьненаюкъара маьIна долу и учреждени Нохчийн Республикин хьалхара Президент, Россин Турпалхо Кадыров Ахьмад-Хьаьжа вина де билгалдоккхуш ян йолийра оццу шарахь университетан гIишлонна бухе даздаран хьолехь «капсула» йиллира цу шеран хIутосург (август) беттан 23-чу дийнахь.
И университет Цхьаьнатоьхначу Эмиратийн халкъера нохчийн халкъана а, ерриге Россина а совгIат хир ду аьлла дара Мухьаммад Аль-Аббарис.
5 000 студентана лерина йолу университетан гIишло яран белхаш кеста дӀабоьрзур бу. Цигахь болх бечу гӀишлошъяран говзанчаша билгалдаккхарехь, университет яран белхаш, карарчу хенахь, 99%-на дӀабирзина лара мегар ду.
Университетехь болх бан дуьненахь а тоьлла болу хьехархой кхойкхур бу. ГIишлойн проектана юкъайогIу 8 корпус, цу юкъахь ю дешаран 3 корпус, 2 юкъараIойла, спорткомплекс, йоккха библиотека, иштта дI.кх.а.
Йина яьлча, университетехь болх беш ингалсан мотт Ӏаморан туш а, 4 факультет а хир ю: архитектурин; совдегараллин а, менеджментан а; инженерин; хаамийн технологийн.
Хаджимусаев Дауд-Хьаьжин цӀарах Исламан туш
Шайхан Дауд-Хьаьжин цIарах йолу туш Соьлжа-ГӀаларчу Мичуринан поселкехь еш ю. Россехь а яккхийчу Ӏилманан-серлонан учрежденех цхьаъ хир йолуш ю иза.
Комплекс иттаннаш эзарнашкахь нахана леринчу маьждигах а, дешаран а, белхан а чоьнех а, Ислам-динца а, хьадисашца а йоьзначу библиотекех а лаьтташ хир ю.
Цигахь Ӏамор бу Герггарчу Малхбалерчу а, Юккъерчу Азерчу а цӀеяхханчу Ӏилманчийн а, имамийн а, иштта, Нохчийчуьрчу устазийн а, шайхийн а белхаш.
Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин цӀарах йолчу Юкъараллин гӀоьналлин фондан чоьтах еш ю керла Исламан туш.
ТӀехьа-МартантӀехь еш йолу керла автостанци
Карарчу шеран чаккхенехь схьайоьллур ю ТIехьа-МартантIехь еш йолу автостанци. Пассажирашна мел оьшуш долу хьелаш хир ду цу чохь кхоьллина.
Цул сов, денна а кхуьуш йогӀучу ТӀехьа-Мартан хазачу гӀишлойн могӀарехь а хир ю иза.
Автостанци яран майданахь, инспекци а еш, хилира Нохчийн Республикин транспортан а, зӀенан а министран заместитель Р.Атаев.
Цо билгалдаьккхира керла автостанци 2019-чу шеран чаккхенехь схьаелла кийча хирг хилар.
Устрада-ГIалахь деш долу петарийн цIенош
Дукха хан йоцуш Устрада-ГӀалахь дан долийна 100 доьзална лерина долу дукхапетарийн 3 цӀа.
ГӀишлошъяран «МегаСтройИнвест» компанис деш долчу оцу 3 цӀенна гуонахара майданаш а, уьйтӀеш а тойийр ю.
Цул сов, машенаш дӀахӀиттайойла йийриг хилар а билгалдаьлла.
Кхуьй а цӀа дина дер долуш ду 2020-чу шеран хьалхарчу чийрикан чаккхенехь.
Хаамаш кечбинарг – А.ИТАЕВА
№78, эсаран (октябрь) беттан 15 де, 2019 шо