ХIокху деношкахь Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин цIарах №12 йолу керла школа схьайиллина Гуьмсехь.
720 дешархочунна лерина ю и школа. Предметашка хьаьжжина, дешаран берриге а гIирсашца кхачо йина ю хIора а класс. Цхьана предметана билгалъяьккхина лакхарчу классийн а, юккъерчу классийн а Iилманан-талламан белхаш дIабахьаран кабинеташ а, химин, биологин лаборатореш а ю школехь.
Иштта, йина кхоллараллин дахарна лерина актови зал а, ешаран чоь а йолуш библиотека а, кхачабааран чоь а, спортан йоккха зал а.
Даздаран хьолехь керла школа схьайоьллучохь дакъалоцуш бара: Нохчийн Республикин Правительствон Председателан заместитель Ахмадов Муса, Нохчийн Республикин чоьхьарчу гIуллакхийн министр Алханов Руслан, республикин Дешаран а, Iилманан а министр Байханов ИсмаьIал, Гуьмсан кIоштан администрацин куьйгалхо Закриев Сахьаб.
Нохчийн Республикин Куьйгалхочунна Кадыров Рамзанна, шен а, гуьмсахойн а цIарах, даггара баркалла элира Закриев Сахьаба.
– Вайн массарна дика хууш ду, вайн мехкан Куьйгалхочо дешарна мел терго еш ю. Берийн дешарна аьттонаш кхуллуш къахьоьгуш ву иза. Дешаран керлачу хIусамехь дика ца деша цхьа а бахьана ца дуьтуш, берриге а аьттонаш бина. Дог тешна ду, шу, дика деша а дешна, Ахьмад-Хьаьжин некъ дIакхехьа хьакъ долуш, яхь йолуш кхуьур ду аьлла, – элира С.Закриевс.
Иштта, вай лакхахь билгалбаьхна куьйгалхой тIеийцира Шелковски кIоштан администрацин куьйгалхочо Хаджиев Хьамида а.
Шековскехь а дара дезде. Цигахь а схьайиллира 720 дешархочунна лерина керла школа. ХIокху заманан технологех пайдаоьцуш, цхьана предметана лерина масех кабинет а йолуш, библиотека, кхачабааран чоь, спортзал а йолуш, пачхьалкхан стандартаца йогIуш ю школа.
Меттигерчу бахархойн дехарца Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин цIе тиллина школина.
– Россин дукхахйолчу регионашкахь дац кхузахь санна, денна а, школаш схьайоллуш, дешарна аьттонаш беш долу хьал. 2020-чу шарахь, вайн республикехь схьайиллина 14 школа. Нохчийчоьнан Куьйгалхочун Кадыров Рамзанан гIонакъосталлица бен далур доцуш хIума дара иза. Мел боккха тIом, харцо сацо ницкъкхочушдерг цхьа герз бен дац – иза Iилма ду. Кадыров Ахьмад-Хьаьжин хьекъало а, цуьнгахь хиллачу Iилмано а сацийра Нохчийчохь хилла тIом, харцо. Цунах масал а эцна, шен ден некъа тIехь къахьоьгуш волчу Рамзана, берашкахь Iилма хилийтарна берриге а аьттонаш бо. Иза доккха беркат ду вайна массарна а, – элира Нохчийн Республикин дешаран а, Iилманан а министра Байханов ИсмаьIала.
Ламасталлин, цIен аса хадийна, схьайиллира школа.
Керлачу школин хьелашка хьаьвсира хьеший. Шайн бераллехь цахилларг, тIекхуьучу тIаьхьенан долуш, баккхийбуьйш бара уьш.
Хьехархоша а, дешархоша а, берийн дай-наноша а даггара баркалла элира мехкан куьйгалхошна.
ВЕГИЕВА Макка
№3, кхолламан (январь) беттан 14 де, 2020 шо