24-чу майхь Соьлжа-ГIалин театральни-концертни зала хьалха даздаран хьолехь билгалдаьккхира славянийн йозанан а, Культурин а де.
Нохчийн Республикин хIора районан музыкальни школин дешархойх а, вокальни коллективийн декъашхойх а лаьттачу эзар берах вовшахтоьхна хор яра концертни залана хьалха дIахIоьттина. Оцу кепара дукха бераш цкъа а хилла дацара цхьана а даздаршкахь. Даздарш долош вайн махкахой а, цига баьхкинарш а Россин исторехь мехалчу денца декъалбира Нохчийн Республикин Культурин министра Дааев Хож-Баудис. Цул тIаьхьа Нохчийн пачхьалкхан I.Шахбулатовн цIарахчу филармонин Симфонически оркестро дакъа а лоцуш, концертни программа йолаелира. Эзарнийн хоран репертуарехь дара россихошна дезаделла долу Даймахках, толамах, бераллах лаьцна долу иллеш, эшарш.
Славянийн йозанан а, Культурин а де Россин Президентан Указца билгалдоккхуш ду 2010-чу шарахь дуьйна. Россин хIора регионехь дIаала дезаш долу илли Федеральни центрехь къастош ду. Карарчу шарахь Соьлжа-ГIала а юкъаяхара Кремлан омрица шена билгалдина илли ала. Иштта, ма-ярра йолчу телеэфирехь, Хабаровск, Казань, Псков гIаланашна тIаьххье, Соьлжа-ГIалин рагI яра. «Пусть всегда будет солнце» йиш лакха езаш яра вайн хор. Оцу эшаран раг1 т1екхачале кхин эшарш лийкхира пачхьалкхан филармонин солисташа.
24-гIа май малх хьаьжна довха де дара. Концертни программа юккъе яьлча «антракт» кхайкхийра. Культурин министра Дааев Хож-Баудис берийн самукъадоккхуш эзар морожни ялийтира эзар берана!
А.-Хь.Кадыровн цIарахчу юкъараллин фондо даьккхинера и сагIа. Цул тIаьхьа, шен планаца дIаяьхьира концерт. Бераша а, церан дай-наноша а сагатдеш ларйора Кремлехь шайн хинйолу эфиран хан. Жоьпалле дара йиш мелла а дика лакха езар. ТIекхечира сатийсина миноташ. Iаламат хаза лекхира нохчийн бераша «Пусть всегда будет солнце» йиш.
Дагадаийта лаьа, славянийн йозанан а, Культурин а де Россехь хIора шарахь 24-чу майхь билгалдоккхуш хилар.
З.ХИЗИРОВА
еара, май беттан 28-гIа де, 2015 шо, № 58