Кхин цхьа а новкъарло ца хилахь, хьуьнан бахамийн дозанаш къасторан болх карарчу шарахь чекхбоккхур бу.
Республикехь дIаболийна оцу декъерчу проекта тIехь белхаш. ТIаьхьарчу 37 шарахь дуьххьара беш бу и болх. Цуьнца нийса а догIуш, республикерчу хьуьнан 15 бахаман дозанаш къасторо аьтто бийр бу дечиган тIаьхьалонаш ларъян а, Iаламан бохамех уьш Iалашъян а, и.дI.кх.а. Иштта хаам бина Нохчийн Республикин Iаламан тIаьхьалонийн а, гуонахара хьал лардаран а министерствон Хьуьнан бахаман департаментан директора Тушаев Лоьмас.
– «Рослесинфорг-о» кечамбаран белхаш хьуьнан 6 бахамехь хIинцале а дIабаьхьна. Уьш бу: Эха-Борзера, ТIехьа-МартантIера, Соьлжа-ГIалара, Гуьмсера, Веданара, Неврера хьуьнан бахамаш. Цу юкъа догIу хаамаш гулбар, картографин материалаш кечъяр, аэрокосмосан суьрташ дахар. ШолгIа мур – лаьтта тIехь болх бар. 2022-чу шеран чаккхенехь республикерчу хьуьнан 15 бахамехь и белхаш чекхбохур бу, – хаийтина цо.
Цо билгалдаккхарехь, лакхахь а аьлла махиллара, карарчу шарахь чекхбаккха лерина хьуьнан бахаман дозанаш къасторан болх.
– Оцу декъера болх, карарчу хенахь, хьуьнан 11 бахамехь хIинцале чекхбаьккхина, бахаман дозанаш дIасацабахьалучу бахаман пачхьалкхан цхьааллин реестрана (ЕГРН) чу даьхна. Дозанаш къастоза бисинарг кхин а 4 бахам бу. Республикин хьуьнан бахамна доккха маьIна долуш болх бу иза, хIунда аьлча, хIора а инспектор, хIора а хьуьнахо хууш хир ву ша Iуналла ден майда муьлханиг ю а, ша стенах жоп луш ву а, – дийцира Тушаев Лоьмас.
Билгалдаккха догIу оцу декъера белхаш, республикехь, тIаьххьара 1983-чу шарахь дIабаьхьна хилар.
Нохчийн Республикерчу хьуьнан бахаман фонд 366,7 эзар гектар сов ю.
И.ИСЛАМОВ
№12, чиллин (февраль) беттан 14 де, 2020 шо