2019-чу шеран лахьанан (ноябрь) беттан чаккхенехь Чинин пачхьалкхан Ухань гIалахь гучуделира коронавирусан ун. Пачхьалкхехь а, цул арахьа а дIасадаьржира иза.
Малайзи пачхьалкхе а кхаьчна и ун. Лоьраш, хаддаза цомгашнаш тIеоьцуш, царна дарба деш, къахьоьгуш бохкуш бу.
Цул сов, церан могашаллина кхерам а бу и ун тIедаларна, амма юхабовла дагахь бац уьш, ун шайн махкара дIадаллалц. Иштта чолхе хьал тIехIоьттинчу Малайзин пачхьалкхан цхьана больницин лоьраша шайн мехкан бахархошка хIоранга а кхайкхам беш: «#тхо хьан дуьхьа балхахь ду, хьо тхан дуьхьа цIахь Iе», – аьлла, флэшбом йолийра. И сурт интернета чухула дукха сиха дIасадаьржира.
Ун даьржинчу пачхьалкхашкарчу лоьраша а дакъалецира оцу акцехь. Тахана даьржинчу уьнан зIе хадор – иза хIора а стаг шен цIахь Iар ду, къаьсттина карантин хIоттийначу муьрехь.
Хууш ма-хиллара, Россе а кхаьчна коронавирусан ун. Цуьнан даржаре хьаьжжина, цхьайолчу регионашкахь карантин кхайкхийна. Оцу регионашна юкъахь ю Нохчийн Республика а.
Таханлерчу (27.03.2020 ш.) дийнахь коронавирус йолуш итт вахархо ву республикехь. Больницашкахь оьшуш болу берриге а кечамаш бина ун ца даржийта.
Соьлжа-ГIалин №1 йолчу I.Ханбиевн цIарахчу клиникин больницин лоьраша а, медйижарша а гIалин а, республикин а бахархошка кхайкхам бина: «#тхо балхахь севцца шун дуьхьа, шу чохь совца тхан дуьхьа», – аьлла флэшмоб.
ДУТУЕВА МАККА
№24, бекарг (март) беттан 27 де, 2020 шо