Нохчийн Республикин Куьйгалхочун Р.Кадыровн Указаца нийса а догӀуш, 2009-чу шарахь дуьйна, товбецан (сентябрь) беттан кхоалгӀачу кӀирандийнахь билгалдоккхучу Нохчийн зудчун денна лерина, даздарийн цхьаьнакхетар дӀадаьхьира республикин Хаамийн а, зорбанан а министерствехь.
Цигахь дакъалоцуш хиллачу Нохчийн Республикин Куьйгалхочун гӀоьнчас – Хаамийн а, зорбанан а министра Дудаев Ахьмада дезачу денца декъалбира нохчийн зударий.
– Нохчийн Республикин Куьйгалхочун а, нохчийн берриге а божарийн а, сайн а цӀарах ас даггара декъалдо шу шайн дезачу денца! Вайн халкъана тӀехӀиттинчу уггаре а чолхечу, халачу хенашках дийнна доьзалшна чӀагӀонаш а, гӀортораш а хилла лаьттина нохчийн зударий. ХӀусамашкахь паргӀато а, кхерчахь йовхо а латтайо аш, – билгалдаьккхира министра.
Иштта, Дудаев Ахьмада карладаьккхира нохчийн зударша хӀоразза а гойтуш долу доьналла, адамалла, синъондалла.
– Дукхазза а вайн халкъо лайначу халонашкахь, баланашкахь, бохамашкахь доьналла гойтуш чекхбевлла нохчийн зударий. Божаршна юххе дӀа а хӀуьттуш, шайн догӀмаш а ца кхоош, шайн бевза-безарш а, цабевзарш а кӀелхьарбаха гӀерташ, къахьегна вайн зударша. Дала декъалбойла вайн наной, йижарий. Ас даггара декъалдо шу Нохчийн зудчун денца! – олуш, дерзийра цо шен къамел.
Цул тӀаьхьа, ведомствехь болх бечу зударшна мехала совгӀаташ а, зезагийн курсаш а луш, нохчийн зударшна лерина концертан программица дӀадерзийра цхьаьнакхетар.
И.ХАСАХАНОВ
№73, товбецан (сентябрь) беттан 19 де, 2020 шо