Вайн республикехь схьайиллина регионна урхалла даран туш (РУТ). Цу хьокъехь хаам бина Нохчийн республикин транспортан а, зIенан а министра Черхигов Рамзана.
Иза схьайоьллучохь дакъалецира Нохчийчоьнан Правительствон Председателан заместительша Магомадов Iабдуллас, Хакимов Хьасана, республикин Куьйгалхочун а, Правительствон а Администрацин куьйгалхочун хьалхарчу заместитела Умаров Джамбулата, транспортан а, зIенан а министра Черхигов Рамзана.
Бахархоша пачхьалкхан Iедалан кхочушдаран органашка, меттигашкахь шаьш урхалла даран органашка деш долу массо а тайпа дехарш, дIахьедарш, беш болу хаамаш, кхайкхамаш цхьаьнатухуш, цаьрга хьовсуш, церан хьесап деш хир ю и туш.
Цу юкъахь хир бу бахархоша социальни сеташкахь, блогашкахь, форумашкахь, кхечанхьа беш болу хаамаш.
«Регионехь пачхьалкхан а, муниципальни а урхалла даран керла кеп (модель) дIахIотторехь коьрта маьIна лелор ду оцу туьшо. Туьшан сервисаша таро лур ю йовхонан карташ хIитто, гIоьртина йолу меттигаш Iораяха, тайп-тайпанчу кIошташкахь, дакъошкахь хийцалуш долчу хьолана тIехь терго латто. Автоматизированни терахьийн системийн гIоьнца цигахь вовшахтухур бу дахаран-Iеран дерриге а дакъошкара хаамаш, церан хьесап а дийр ду», – элира Черхигов Рамзана.
Регионна урхалла даран туш кхоьллина Россин Федерацин Президентан В.Путинан «Регионна урхалла даран туш кхолларна а, цуьнга болх байтарна а кхачояран хьокъехь» долчу Указаца нийса а догIуш.