Федеральни бюджетера кхитIе а 279,9 миллион сом ахча лур ду Нохчийн Республикина доха гергадаханчу цIенойн метта керла цIенош дарна. Оцу хьокъехь хаам бира Нохчийчоьнан гIишлошъяран а, хIусамийн-коммунальни бахаман а министран заместитела Газалапов Ахьмада.
Дуьйцучу гIуллакхна ахча лур ду «ХIусамаш а, гIалара хьал а» къоман проект а, «Чохь Iан мегар йоцчу хIусамийн фонд тешам боллуш лахъярна кхачояр» федеральни проект а кхочушъяран гурашкахь.
А.Газалаповс дийцарехь, кхитIе а ахча далар бахьана долуш, регионан аьтто хир бу йоха гергаяханчу хIусамашкара 302 стаг дIакхалхо. Цу тайппана, шо чекхдалале, Соьлжа-ГIалара а, Гуьмсан а, Шелковски а кIошташкара а йоха гергаяхана 7 эзар м² хIусамаш дIаяха таро хир ю.
«ХIокху шарахь вайн республико тIехкхочушйина керлачу хIусамашка нах дIакхалхоран программа. Керлачу хIусамашка дIакхалхийна 757 стаг. Министерствос барт бина «ЖКХ-на реформаш яран гIолацаран фонд» Госкорпорацица. Оцу бартаца нийса а догIуш, кхитIе а харжаш къастор ю программа кхочушъярна», – элира цо.
Чохь Iан мегар йоцчу хIусамашкара нах керлачу хIусамашка дIакхалхоран гIуллакх графикал хьалха чекхдоккхуш ду.
Программин шина шеран дакъа чекхдаккхаран хьокъехь бина тIелацамаш кхочушбина вайн регионо.
№90, лахьанан (ноябрь) беттан 18-гIа де