Республикехь, «ХIусамаш а, гIалара хьал а» къоман проект кхочуш а еш, 2021-чу шарахь куьце ялор ю 26 ков-керт.
Оцу хьокъехь хаам бина хIокху деношкахь Нохчийчоьнан гIишлошъяран а, хIусамийн-коммунальни бахаман а министран заместитела Ибрагимова Алисас.
«Къоман проект кхочушъяр бахьанехь хIора шарахь республикерчу ярташкара а, гIаланашкара а иттаннаш ков-керташ хазлой, толой, хазачу суьрте йоьрзий дIахIуьтту. ТIедогIучу шарахь царна тIекхетар ю кхин а 26 ков-керт. Оцу декъехь дукхах болу белхаш дIахьур бу Соьлжа-ГIаларчу Старопромысловски кIоштахь. Ков-керташ, майданаш, урамаш аьхна, ерриге бегIийлаш йолуш хилийтаран программе къаьсттина доккха хьашт ду вайн регионехь. Бахархоша оцу декъехь шайна бегIийла хетарг довзуьйту, тидам латтабо беш болчу белхашна тIехь. Наггахь шаьш а гIолоцу меттигаш куьце ялоран белхеш дIабахьарехь. Бахархоша, къобалдо садаIа меттигаш алсамъяхар», – билгалдаьккхира министран заместитела.
Цо дийцарехь, бахархоша жигара дакъа а лоцуш, билгалъяьхна 2021-чу шарахь куьце ялон йолу цIеношна гонахара майданаш а, ков-керташ а.
Хьаххийначуьра аьлча, хIокху шарахь куьце ялийна юкъараллин 43 майда, 48 цIийнан ков-керт.
Цу тайппана гIуллакхаш дIадаьхьна Нохчийчоьнан 17 кIоштахь: тодина гIашлойн некъаш, соьналла кхиийна, ловзаран майданаш йина, серлонан бIогIамаш дIахIиттийна, паркашкахь а, скверашкахь а, дукхапетарш йолчу цIеношна хьалха а гIанташ хIиттийна.
Хь.САИДОВ
№91, лахьанан (ноябрь) беттан 21-ра де