Ша вовшахтоьхна 15 шо кхачар селхана билгалдаьккхинчу Нохчийн Республикин Парламенто, шен оьмарехь, 985 республикин закон а, 3 571 сацам а тӀеэцна.
Цул сов, къобалдина федерацин тӀегӀанера 9 608 закон а. 7 эзар сов цхьаьнакхетар дӀадаьхьна бахархошца, иштта, 5 эзар гергга – бахархой тӀеэцар а. Бахархоша дина 4 эзар сов дехар а теллина.
Республикин законаш дахаран коьртачу органан 15 шо кхачарна леринчу гуламехь дакъалецира Нохчийн Республикин Куьйгалхочо Кадыров Рамзана а, мехкан Муфтис Межиев Салахь-Хьаьжас а, министрийн кабинетан декъашхоша а, кӀоштийн дайша а, бакъонашларъяран органийн хьаькамаша а.
Цигахь билгалделира Нохчийн Республикина, метта а хӀоттийна, тӀеман муьрехь яйна хилла йолу пачхьалкхан 4 орден юхаерзийна хилар: Ленинан орден (1965), Октябрьски революцин орден (1972), Халкъийн доттагӀаллин орден (1972), Къинхьегаман ЦӀечу Байракхан орден (1982).
И орденш республикина Ӏилманан а, могашаллаӀалашъяран а, производствон а, кхидолчу дакъошкахь а баккхий кхиамаш бахарна елла яра.
Нохчийчоьнна уьш юхаерзоран болх республикин Куьйгалхочун Кадыров Рамзанан тӀедилларца дӀаболийна а, цхьана шарахь гергга дӀабаьхьна а бу.
Парламентан спикеран Даудов Мохьмадан тӀедилларца нийса а догӀуш, Нохчийн Республикин Къоман музейна дӀаелла и йиъ а орден.
Билгалдаккха догӀу уьш [меттахӀиттийна орденаш] Россин Федерацин Президента Путин Владимира куьг яздина хилар.
Нохчийн Республикин Къоман музейн директора Асталов Вахас а, Нохчийн Республикин Парламентан спикеран хьехамчас, историн Ӏилманийн кандидата Бугаев Ӏабдуллас а дӀадаьхьира орденаш дӀаяларан-тӀеэцаран гӀуллакх.
И.ИСЛАМОВ
№93, лахьанан (ноябрь) беттан 28-гIа де