Лахьанан (ноябрь) бутт беркате беана Нохчийн пачхьалкхан хьехархойн университетан физически культурин а, спортан а факультетан студенташна.
Оцу факультетехь даздаран хьолехь схьайиллина дешарантренировкийн база.
Иза схьаелларехь дакъалецира Нохчийн пачхьалкхан хьехархойн университетан ректоран декхарш кхочушдечу Байханов ИсмаьӀала а, университетан Ӏилманехула а, дуьненаюкъарчу гӀуллакхашкахула а волчу проректора Арсалиев Шавадис а, физически кульурин а, спортан а факультетан декана Элипханов Салмана а, оццу факультетан профессора Аслаханов Сайд-Ӏалис а, университетан кхечу факультеташкарчу студенташа а, хьехархоша а.
Байханов ИсмаьӀала баркалла элира университетан спортан керлачу майданан проект вовшахтохарна а, иза кхочушъеш жигара дакъалацарна а университетан физически культура хьехаран теорин а, методикин а кафедрин профессор а, Нохчийн Республикин физически культурин хьакъволу белхахо а волчу Аслаханов Сайд-Ӏалина.
Дешаран-тренировкийн базехь йоккха майда ю футболан, баскетболан, волейболан, теннисан, бадминтонан, гандболан ловзаршна. Чов хиларх ларвеш йина ю майдан тӀехуле.
Студентийн дешарна дог-ойла гIаттийна ца Ӏаш, университеташна юкъахь спортан къийсадаларш дIадахьарехь а пайдехь хир ю тренировкийн база.
Керлачу базехь долчу хьелийн мах хадийра «Грозный» волейболан клубан декъашхоша а, студенташа а.
Университетан студентийн шайн мокъа хан беркате а, могашаллина пайдехь а яккха дика аьтто бу иштта база хилча.
З.ЭЛЬДЕРХАНОВА
Суьрта тӀехь: Хьехархойн университетехь дешаран-тренировкийн база схьаеллар
№94, гIуран (декабрь) беттан 2-гIа де