Республикин пачхьенан Думин тӀедилларца нийса а догӀуш, пачхьенан мэрис дӀаболийна Соьлжа-ГӀалин каппийн а, яртийн а, кӀоштийн а цӀераш хийцаран хьокъехь бахархошка хаттам баран болх.
Оцу белхан лехамашца нийса а догӀуш, соьлжагӀалахоша, карарчу беттан 25-гӀа де тIекхачале, къасто деза, кӀоштийн а, каппийн а, яртийн а цӀераш хийца шаьш реза ду я дац бохург.
Яртийн хьокъехь аьлча, юьйцург пачхьенан Октябрьски кӀоштара Гикало а, Шинасуьйра-Юкъ а ю: Гикало юьртана Элиханов Джамлайлан цӀе тилла лерина, ткъа Шинасуьйра-Юкъ юьртана – Шайх Несерхоев Изновран цӀе.
Иштта, хийца лерина каппийн цӀераш а: Мичурина – Шайх Хаджимусаев Дауд-Хьаьжин цӀарах; Родина – Исаев Хьусайнан цӀарах; 3-й совхоз – Арсанов Дени-Шайхан цӀарах; 30 участок – Суьйр-Корта; г-к Иванова – Дадин Айбикин цӀарах; Соленая балка – Дарбан-Хи.
Бароновка а, Башировка олуш йолу 2 куп вовшахтоха лерина ю Соьлжа-ГӀалин дума, керлачу куьпана КишиевгӀеран куп цӀе а туьллуш.
Амма кхин а маьӀне ду кӀошташца дан леринарг – Соьлжа-ГӀаларчу 4 а кӀоштан цӀе а ю хийца лерина: Ленински кӀошт – Ахьмадан кӀошт; Заводски кӀошт – Шайх Мансуран кӀошт; Октябрьски кӀошт – БойсгIаран кӀошт; Старопромысловски кӀошт – Висаитовн кӀошт.
Чаккхенехь дагадаийта догӀу Нохчийчоьнан къилба-малхбалехь йолчу Веданан кӀоштара оьрсийн маттахь «Первомайская» цӀе а йолуш йолчу Хьаьжи-Эвлан цӀе а хийцина хилар – хӀинца дуьйна иза оьрсийн маттахь Хажи-Эвла ю.
И.ХАСАХАНОВ
№97, гIуран (декабрь) беттан 12-гIа де