МЧС-н белхахоша боккха тидам тIебохуьйту, къаьсттина газан а, токан а гIирсаш дIахIитторехь лардала дезаш хиларна.
Вайна ма-хаъара, гурахь а, Iай а газан а, токан а гIирсаш дIахIиттош кхерамазаллин бакъонаш ларъеш цахиларо дуккха а дагахь боцу бохамаш, сингаттамаш бо. И саннарг ца хилийта профилактикин болх дIахьош къахьоьгуш бу МЧС-н векалш.
Цара цIеяларан, дукха хьолахь, хуьлучу бахьанех лаьцна дийцина ца Iаш, цIе яьлла меттиг нисъеллачохь уггаре а хьалха дан дезарг а гойту.
Хууш ма-хиллара, республикин тайп-тайпанчу школашкахь а, берийн бошмашкахь а МЧС-н белхахоша дIахьош ду бераш цIарах лардарна лерина цхьаьнакхетарш.
ХIокху деношкахь Соьлжа-ГӀалин БойсагӀаран (Октябрски) кӀоштарчу бӀаьрса доцучу а, ледара долчу а школа-интернатерчу берашца цхьаьнакхийтира МЧС-н векалш.
Бераш цIеяларх лардалийта а, цIе яьлла бохам хилла меттиг хилахь, цигахь хIун дан деза хаийтар а коьрта Iалашо йолуш, вовшахтоьхна дара и цхьаьнакхетар.
Цул сов, белхахоша берашна дийцира муьлхачу гIирсо цIеяйарехь хIун гIо до.
Дешархойн аьтто хилира МЧС-н белхахойн технике бIаьргтоха а, цIеяларх ларбаларан бакъонаш йовза а, «огнетушитель» муха лело еза Iама а.
Иштта, боевкаш а, йовхо юхатухуш йолу костомаш а тIеюьйхина, кIеззигчу хенахь, «цIеяйархой» хила а.
Цул тӀаьхьа цӀеяйаран-кӀелхьарадахаран белхахоша цӀеяларан бохамах лардала дезаш хиларх лаьцна хьехам бира хьехархошна а, школин белхахошна а.
Россин МЧС-н Нохчийн Республикехула йолчу Коьртачу урхалло цӀеяларан бохамах лардала дезаш хиларх лаьцна профилактикин белхаш дIахьур бу хIусамашкахь йовхо латторан мур чекхбаллалц.
МУСЛИМОВ Абу
№4, кхолламан (январь) беттан 20-гIа де