Нохчийн Республикин туризмехула йолчу министерствон куьйгалла 2021-чу шарахь дуьххьарлера гӀаш некъ бар вовшахтоха дагахь ду чиллин (февраль) беттан 13-чу дийнахь.
Телевизорийн я телефонийн экранашна тӀехь бен Даймохк ца гуш, кхузаманан хьелаша шайн-шайн хӀусамийн а, кабинетийн а «йийсархой» а бина Ӏаш болчу нахана, дог-ойла гӀаттош, дика бахьана ду аьлла хета иштта некъ беш, Даймахкахула гуо тосуш, чекхбовлар.
Ӏаламехь, цӀеначу хӀаваэхь садаӀар дезачу нахана Нохчийн Республикехула кхочушъян билгалъяьккхина маршрут ю «Дахаран хьоста» аьлла.
Иштта, Къоьзан-Ӏома йисттера дӀадуьйладелла, Веданан кӀоштарчу Буне юьрта кхаччалц некъаш гездийр ду. Цунна юкъа «Хой – некъахойн кӀотар» аьллачу музей чу хӀиттар а, цул тӀаьхьа АьхкатӀай хин чӀожехула чекхдовлар а догӀу.
Цигахь туристийн аьтто хир бу нохчийн ширачу бӀаьвнех бӀаьргтухуш, лаьмнийн аренийн хазаллех марзо оьцуш, садаӀа.
Маршрут дӀаерзор ю дааран-маларийн тойца. Маршрутан йохалла 10 км ю, ткъа некъан чолхалла юккъерчу барамехь бен яц. Некъ барна лерина хан 4–5 сахьт ду.
Туристийн хенаш: 18 шарал лакхара.
Некъ бан вовшахкхета де а, меттиг а: чиллин (февраль) беттан 13-чу дийнахь, Ӏуьйранна 7 сахьт 00 минот яьлча, «Грозный-Сити» комплексана хьалха.
Некъ бечарна кхача а, транспорт а Министерствос вовшахтухуш ю.
Некъ барехь дакъалаца луучарна шайх болу хаам (фамили, цӀе, ден цӀе, вина хан, карарчу хенахь Ӏаш волу меттиган адрес, телефонан номер) хӀокху телефона тӀе дӀатаса: +7(922)007-51-60.
№9, чиллин (февраль) беттан 6-гIа де