Соьлжа-ГӀалахь дӀахьош хиллачу Ӏилманан-практикин конференцехь цхьаьнакхеттера Къилбаседа-Кавказан федеральни округан тоьлла берийн лоьраш.
«COVID-19 ун даьржачу муьрехь берийн тергояран башхаллаш» аьллачу темина лерина яра конференци.
Цигахь дакъалоцуш яра Россин педиатрийн Союзан председатель, Россин академин академик Намазова-Баранова Лейла а, Россехь дика бевзаш болу лоьраш-говзанчаш а.
Конференцин дакъалацархошка, хьешашка маршаллин дош элира Нохчийн Республикин могашаллаӀалашъяран министра Сулейманов Эльхана.
Цо билгалдаьккхира вайн республикин берийн лоьрийн COVID-19 ун хьакхаделлачу берашца болх барехь докха зеделларг хилар.
«Е.П.Глинкин цӀарах йолу Берийн клиникин республикин больницина Россин педиатрийн Союзо дӀаяьхьна хиллачу конкурсан «Педиатрин профилан медицинин организаци – 2019» аьллачу номинацехь тоьлла хилар хьесапе а эцна, толамхойн сий деш керла седа юкъабаьккхина. Нохчийн Республикин педиатрин служба кхиорехь бӀаьрла кхиамаш баьхначу лоьрашна и билгало совгӀатана яларан ламаст хилла дӀагӀур ду кхул тӀаьхьа», – хаам бира Э.Сулеймановс.
Министр Сулейманов Эльхан а, министерствон Ноналлин а, бераллин а департаментан директор Саратова Элита а оцу седанца совгIат дина дуьххьарлера лоьраш бу лараме кхаьчначарах.
З.ЦЕНТОРОЕВА
№9, чиллин (февраль) беттан 6-гIа де