Нохчийн Республикин Премьер-министр Хучиев Муслим белхан гӀуллакхца лаьмнашкарчу Шаройн кӀоштахь хилира.
Уггаре а хьалха Кенхехь хилира иза, цигахь ян йолош йолчу спорткомплексан майдане а хьожуш.
И объект Кадыров Ахьмад-Хьаьжин цӀарахчу Регионан юкъараллин фондан чоьтах еш а ю, 200 квадратни метр дӀалоцуш а, 60 стагана лерина а хир ю.
Цул тӀаьхьа, шеца цхьаьна республикин Культурин министр Дааев Хож-Бауди а волуш, Шарарчу бӀаьвнийн комплексехь хилира министрийн кабинетан куьйгалхо.
Кадыров Ахьмад-Хьаьжин цӀарахчу регионан юкъараллин фонтан чоьтах меттахӀоттош йолу и комплекс 34 объектах лаьтташ ю – тӀеман 7 бӀаьвнах а, 1 маьждигах а, иштта, чохь Ӏаран 24 гӀаланах (хӀусамах) а.
МеттахӀитторан белхаш чекхбаьхначул тӀаьхьа и меттиг Шаройн кӀоштан хилла ца Ӏаш, ерриге Нохчийчоьнан а «туризман васт» хирг хиларх ша тешна хилар билгалдаьккхира Хучиев Муслима.
Юха, ХӀимахь кхеташо дӀа а хьош, дийцаре дира кӀошт кхиоран гӀуллакхаш.
Коьртачу декъана дийцаре дира кӀоштан цхьайолчу ярташна газаца а, токаца а кхачояран болх жигарабаккхаран а, иштта, мобильни сетаца доьзна а гӀуллакхаш а.
Кхеташонехь билгалдаьккхина ма-хиллара, мобильни сетаца кхачояран декъера белхаш кӀошт ма-ййу дӀабахьа безаш белахь а, къаьсттина терго ХӀимахь а, Кенхехь а бан безачу белхийн йийр ю.
Оцу кӀоштана шайн-шайн сеташца кхачояран декъехь шаьш дан леринарг тӀебогӀучу баттахь довзуьйтур ду республикехь болх бечу мобильни операторша.
И.ИСЛАМОВ
№13, чиллин (февраль) беттан 20-гIа де