Россин МЧС-н Нохчийн Республикехь йолчу коьртачу урхаллин куьйгалхочун тIедилларца, хIокху деношкахь, Соьлжа-ГIалахь, цIеяйъаран-кIелхьарадахаран дакъошна юкъахь, некъан бохаман тIаьхьенаш дIаяхаран хьокъехь Iамораш хилира.
ГIо оьшуш стаг хилахь, цунна дика гIо дийр долу говзалла караерзор а, цӀеяйъаран-кӀелхьарадахаран белхахойн корматалла лакхаяккхаран а Ӏалашонца вовшахтоьхна дара уьш.
Командашна хьалха лаьтташ дара некъан бохамехь лазийна стаг машен чуьра схьаваккхаран декхар. И гIуллакх сиха а, бакъонаш ларъеш, нийса а дан дезара.
Иштта, МЧС-н белхахоша йовзийтира йохийначу машен чуьра лазийнарг схьаваккхаран а, цIейойъург нийса лелоран а кепаш. Гайтира, некъан бохамашкахь лазийначарна больнице кхачале гIо муха дан деза а.
Кхерам я бохам тIехIоьттинчохь сиха гIо дан шаьш кийча хилар а, шайгахь хьуьнар, хаарш хилар а гайтира МЧС-н белхахоша оцу къовсамехь.
Иштта, тоьлларг а къастийра командашна юкъахь — Соьлжа-ГӀалин Висаитовн кIоштахь долчу цIеяйъаран-кIелхьарадахаран №5 йолчу декъан белхахоша яьккхира хьалхара меттиг.
Цул сов, толам баьккхинчеран аьтто хир бу регионашна юкъахь дIадахьа леринчу къийсадаларашкахь дакъалаца.
А.АБУЕВ
№22, бекарг (март) беттан 24-гIа де