Дуьненахь а, Россехь а гIараяьллачу А.Н.Бакулевн цIарахчу деган-пхенийн хирургин медицинин Iилманан-талламан къоман институтан говзанчийн тобанца цхьаьнакхийтира Нохчийн Республикин могашаллаIалашъяран министр Сулейманов Эльхан.
Нохчийн Республикин кардиологин служба кхиорна лерина дӀаяьхьначу «горгачу стоьлехь» дакъалецира Москварчу лоьраша.
А.Н.Бакулевн цIарахчу деган-пхенийн хирургин медицинин Iилманан-талламан къоман институтан туьшан лоьрийн тоба тӀелецира Е.П.Глинкин цIарахчу берийн клиникин республикин больницин коьртачу лоьро Межидов Казбека.
Деган-пхенийн цамгарш йолчу берашна маьхза консультацеш а еш, диагностикин талламаш бира цара. Шина дийнахь лоьраша тӀеийцира амбулаторин а, стационаран а 200 сов жима дархо. Царна юкъахь хирургин гӀо оьшуш долу бераш Москварчу А.Н.Бакулевн цIарахчу деган-пхенийн хирургин медицинин Iилманан-талламан къоман институтан туьше дӀадига сацам а бира.
Нохчийн Республикин могашаллаIалашъяран министерствон штатехь йоцчу берийн коьртачу кардиологан Мурадова Лилин чоьтехь 3 552 бер ду.
Церан хьашташ кхочушдеш ду Нохчийн Республикин Е.П.Глинкин цIарахчу берийн клиникин республикин больницин кардиоревматологин отделенехь.
2020-чу шарахь оцу отделенехь дарба лелийна деган-пхенийн цамгарш йолчу 611 берана.
Нохчийн Республикин деган-пхенийн хирургин службин лоьраша бечу балхана реза хилира Москвара говзанчаш.
Иштта, цхьаьна дIахьочу белхан эвсаралла кхин а лакхаяккха езаш хилар а билгалдаьккхира Нохчийн Республикин могашаллаIалашъяран министерствехь.
2018-чу шеран гIуран (декабрь) беттан хьалхарчу деношкахь дара Россин Федерацехь а, дуьненахь а вевзаш волу кардиохирург, А.Н.Бакулевн цIарахчу деган-пхенийн хирургин Iилманан туьшан куьйгалхо, Россин Iилманийн академин академик Бокерия Лео Соьлжа-ГIала веача.
Оцу цхьаьнакхетаран беркат ду Москвара лоьраш вайн республике кест-кеста кхочуш а, кегийчу дархойн гӀуллакхе хьовсуш а хилар.
З.ЭЛЬДЕРХАНОВА
№21, бекарг (март) беттан 20-гIа де