Масех де хьалха доккха дезде дара Шуьйтан кӀоштарчу Гоьргачахь. Цигахь схьадоьллуш дара Нохчийн ширачу архитектурин кепехь дина, 150 стагана лерина керла рузбанан маьждиг.
Маьждиг схьаделларехь дакъалецира Нохчийчоьнан муфтис Межиев Салахь-Хьаьжас.
И беркате гӀуллакх Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин цIарахчу юкъараллин фондан чоьтах дина.
Цу тайппана хаза совгӀат шайна дарх, баккхийбийна а ца бовлуш, даггара баркалла бохура меттигерчу бахархоша.
И маьждиг схьаделлар бахьана долуш, хӀинца дуьйна рузба шайн юьртахь дан аьтто хир бу церан, хӀинццалц уьш луларчу ярташка лелаш бара.
Оцу хиламца юьртан а, кӀоштан а бахархой декъалбира Нохчийн Республикин Куьйгалхочо Кадыров Рамзана.
Цул сов, цо баркалла элира, гIишло ярна жоьпалле волчу, Нохчийн Республикин Куьйгалхочун хьехамчина Эдильгириев Амруддина а маьждиг даран белхаш жигара дӀабахьарна.
Ламаст а хилла дӀахӀоьттина ма-хиллара, Делан хӀусамехь мовлад дийшира. Цул тIаьхьа, Межиев Салахь-Хьаьжас имамалла а деш, рузбанан ламаз дира.
Маьждиге баьхкинчара Нохчийн Республикин Куьйгалхочунна баркалла элира маьждиг дарна, иштта, шайн доIехь Нохчийчоь а, нохчийн халкъ а, цуьнан Куьйгалхо а вийхира цара.
Дагадаийта лаьа, карарчу шарахь Нохчийчохь кхин а 12 маьждиг дина хилар.
А.КАНТАЕВ
№28, оханан (апрель) беттан 14-гIа де