Хьомсара вежарий, йижарий! Даггара декъалдо шу Исламан сийлахьчу марханаш дастаран дезачу денца. Дийнахь сарралц, кхача ца бууш, хи ца молуш Iарца бусалбанаша шайн ийман, собар зуьйш болу мур чекхбаларан билгало ю иза.
Вай сийлахь Рамадан бутт новкъа боккху вайна тIедехкинчу декхаршца (парзашца, суннаташца) вай хьакъ ма-дду ларийна хиларх, даггара тешна а долуш, Делера ял хиларе сатийсарца. Вай хIора дийнахь марха а кхобура, вай кхоьллина Волчу Сийлахь-Везачу АллахIана хастамаш а бора, Цуьнга дехарш деш вешан доIанаш а дора, Цунна ойла тIе а ерзайора, Цуьнан къинхетамах, Цо къинхетам бийриг хиларх чIогIа тешна а долуш.
Оцу дийнахь бусалбанаша вовшашна совгIаташ до, вовшийн марханаш къобалдо, гергарчаьрга доьлху, гIо до гIийлачарна, цомгашчарна, гIорасиз болчарна, Дала базбина баийтина сийлахь Рамадан хьакъ ма-дду чекхбаккха, берзо гIерта.
Беттан ерриге а йохаллехь вайх хIора а сагIанаш дахарца, марханаш кхабарца, Iамал-Iибадат дарца вешан диканаш совдаха гIертара.
Суна къаьсттина билгалдаккха тамехь ду Россин Турпалхочун Кадыров Ахьмад-Хьаьжин цIарахчу регионан юкъараллин фондо Рамадан баттахь цкъа а ца даьккхинчу барамехь доккха сагIа даьккхина хилар. И сагIа 100 эзар сов доьзале кхаьчна. Республикин хIора юьртахь, шахьарахь бехаш болчу таронаш ледара йолчу массо а доьзалан аьтто бина марха дастийта.
Шеко йоццуш, оцо тоьшалла до вай Кхоьллинчун къинхетам доза доцуш хиларна, Цо вайн аьтто бина вовшашна гIо дан, вайн сийлахь-безачу махкахь маьрша, беркате даха.
Хьомсара бусалбанаш! Дала къобалдойла шун марханаш, шун Iибадаташ! Дала жоп лойла шун доIанашна! Дала Шен къинхетам тIебоссабойла вайна! Лаьа шу дерриге а маьрша дехийла, шун аьтто хуьлийла! Лекха Волчо гIо дойла шуна дикачу дIадолорашкахь!
№36, хӀутосург (май) беттан 12-гIа де