Керл-керлачу гIаланашка хIаваакеманийн некъаш схьадоьллу Нохчийчуьрчу «Вайнахавиа» предприятис. ХIинца 15-чу июнехь дуьйна Соьлжа-ГIалара хIаваакема лелар ду Симферополе. Кеманаш кIиранах шозза гIур ду цига: оршотдийнахь а, пIераскандийнахь а. Ткъа цигара схьадогIур ду кхаариндийнахь а, кIирандийнахь а.
Цул совнаха, авиакампанис Россин «ЮТ-Эйр» авиакампаница барт бина Соьлжа-ГIала – Санкт-Петербург авиарейсаш яран хьокъехь. Цунах лаьцна дийцира «Вайнахавиа» предприятин генеральни директора Гамбулатов Султана.
Цига цкъа дахана кема. ТIейог1учу хенахь оцу авиакампанин кеманаш лела тарлуш ду Соьлжа-ГIалара Москва а. Цул совнаха, барт хилла «Ют-эйран» кеманаш Соьлжа-ГIаларчу аэропортехь латтаран хьокъехь. Уьш лелар ду Екатеринбурге а, Тюмене а, ткъа иштта Къилба Федеральни округан ерриге а яккхийчу гIаланашка а.
«Вайнахавиан» кеманаш ширдаларца доьзна билгалдеш ду авианекъашна кхечу авиакампанийн кеманех пайдаэцар. Карарчу хенахь Соьлжа-ГIала – Москва-Домодедово лелаш ду 2014-чу шарахь дина долу керла Суперджет SSJ-100 кема.
«Авианекъашкахь муьлха кеманаш лелар ду, хIинца а билггал къаьстина дац, амма 120 меттиг йолу А-319, я А-320 аэробусах пайдаэцарна тIехь ойла соьцуш ду тхо. Ишттачу шина кемано юьззина кхачо йийр ю тхан хьашташна», – элира С.Гамбулатовс.
С.РУСЛАНОВ
№ 64, еара, 11 июнь, 2015 шо