Белхан гIуллакхца Нохчийн Республике веара Россин юстицин министр Чуйченко Константин. Оцу хьокъехь хаам бира социальни сетерчу шен агIонехь Нохчийн Республикин Куьйгалхочо Кадыров Рамзана.
Соьлжа-ГIалин аэропорте федеральни ведомствон куьйгалхочунна дуьхьал баханчу Нохчийчоьнан Iедалан векалшна коьртехь вара Нохчийн Республикин Парламентан Председатель Даудов Мохьмад.
Аэропортера, уьш, Кадыров Ахьмад-Хьаьжин цIарахчу Сийлаллин Мемориалан комплексе баьхкира. Цигахь цара зезагийн курсаш ехкира Нохчийн Республикин хьалхарчу Президентан Кадыров Ахьмад-Хьаьжин хIолламна хьалха.
Юха, музейхь йолчу экспонаташка хьаьвсира. Хьешана къаьсттина безам хийтира Ахьмад-Хьаьжин белхан кабинет.
Цул тIаьхьа К.Чуйченко Минюстан регионан урхаллехь а, суьдан пурстоьпийн Федеральни службин республикерчу урхаллехь а, таIзар кхочушдаран федеральни службин Нохчийчоьнан урхаллехь а хилира. Иштта, Соьлжа-ГIаларчу талламан изоляторе а (№1 йолу СИЗО) а кхечира иза.
Федеральни министран К.Чуйченкон цхьаьнакхетар хилира Нохчийн Республикин Куьйгалхочуьнца Кадыров Рамзанца.
«Константин Анатольевичца хиллачу цхьаьнакхетарехь чулацаме а, мехала а къамел хилира. Ларамечу хьешана ас баркалла элира Нохчийчу варна. Цхьа а шеко яц, шен бIаьргашна ган а гина, меттигашкахь долчу хьолан мах хадор тоьлаш ду. Иза чIогIа пайдехь а ду кхидIа а цхьаьнагIуллакхаш дарна, мехала декхарш кхочушдарна», – яздина Кадыров Рамзана социальни сетерчу шен агIонехь.
Цо дийцарехь, федеральни менистра лаккхара мах хадийна ФСИН-н а, ФССП-н а учрежденийн белхан а, цара вовшашца цхьаьнагIуллакхдаран а. Министр тешна вара кхул тIаьхьа а иштта беркате цхьаьнагIуллакхаш дар дIахьуриг хиларх.
«Хьешаца цхьаьна экскурси йира оха. Тхо зоопаркехь хилира. Ас цунна гайтира уггаре а тешаме а, оьзда а долу дийнаташ – говраш. Адамаш чIогIа дика девза царна. Шаьш езаш долу адамаш а чIогIа деза царна, говраш царна хьеста а ло. ХIинца а, шена хазахетар гойтуш, хаза а, оьзда а йолу башха говр голаш тIе хIоьттира, ша йолчу дахкарна суна а, Константин Анатольевична а реза хилар гойтуш. Экскурси ерзош, нохчийн кертахь чай мала севцира тхо», – дерзийра регионан Куьйгалхочо.
Д.АНАДЕВ
№43, асаран (июнь) беттан 9-гIа де