Устрада-ГӀалин Культурин цӀийнехь берийн-кхиазхойн «Кавказан лаьмнийн сийлалла – 2021» дуьненаюкъара фестиваль дӀаяьхьира.
Цигахь дакъалецира Малхбален федеральни округан а, Къилбаседа-Кавказан федеральни округан а 8 регионерчу 14 кхоллараллин коллективо. Цара гайтира Кавказан халкъийн 35 хелхар, вокальни-инструментальни 15 номер. Дакъалоцуш 500 сов стаг вара.
Фестивалехь конкурсан номерш а, мастер-классаш а гайтира Кавказан халкъийн доттагӀаллин темина лерина.
«Кавказан халкъийн хелхарш» номинацехь Гран-При совгӀат даьккхира ГӀебартойн-Балкхаройн Республикин Нарткала гӀаларчу «Дыгэшыр» ансамбло а, оццу республикерчу Псыгансу гӀаларчу «Псыгансу» ансамбло а.
1-чу даржан Диплом даьккхира Дагестан Республикин ХIинжа-ГIалин «Махачкала» ансамбло, 2-чу даржан Диплом – Нохчийн Республикин Устрада-ГӀалин Берийн искусствийн школин «Аргун» ансамбло, 3-чу даржан Диплом – Къилбаседа ХӀирийнчоь Республикин Моздок гӀаларчу «Пируэт» ансамбло.
Ткъа «Халкъан гIирсаш» номинацехь Гран-При совгӀат даьккхира Къилбаседа ХӀирийчоь Республикин Ногир юьртарчу «Лучики Осетии» пондарчийн ансамбло.
1-чу даржан Диплом даьккхира Къилбаседа ХӀирийн-Аланин Республикин Моздок гӀаларчу Шихаева Миленас а, Москалюк Майяс а, 2-чу даржан Диплом – Къилбаседа ХӀирийчоь Республикин Моздок гӀаларчу Бицаева Эмиляс, 3-чу даржан Диплом – Къилбаседа ХӀирийн Республикин Моздок гӀаларчу Догужаева Мадинас.
«Соло» номинацехь Гран-При совгӀат даьккхира Нохчийн Республикин Устрада-ГӀалин Культурин цӀийнан векала Муцахаева Селимас а, ткъа 1-чу даржан Дипломаш дехира Устрада-ГӀаларчу Берийн искусствон школин дешархочо Осмаев Мусас а, Эна-Хишкан кӀоштарчу Эха-Борзе юьртарчу Дукаева Аминас а.
№47, асаран (июнь) беттан 23-гIа де