Серби пачхьалкхан бусалбанийн динан урхалло Нохчийн Республикин Куьйгалхочуьнга Кадыров Рамзане дехна Рашски областехь шайна хьафизийн хьуьжар яр. Оцу хьуьжарна Нохчийн Республикин хьалхарчу Президентан Кадыров Ахьмад-Хьаьжин цIе тилла лууш бу уьш.
Цу хьокъехь хаам бира дуьненаюкъара «горга стол» дIахьочу хенахь Европерчу бусалбанийн форуман председатела Ниязов Iабдул-ВахIида. Ткъа и «горга стол» дIаяьхьира хIокху шеран асаран (июнь) беттан 30-чу дийнахь Нови Пазар гIалахь.
«Горгачу стоьлан» дакъалацархоша, мехала де – Нохчийн Республикин хьалхарчу Президентан Кадыров Ахьмад-Хьаьжин 70 шо кхачаран де – тIекхочуш хилар билгал а доккхуш, Нохчийн Республикин тхьамда Кадыров Рамзан бусалбанашна, цу юкъахь Балканехь болчу бусалбанашна гIо дан лууш хилар а хууш, Нохчийчоьнан куьйгалле дехна регионехь уггаре а йоккха Къуръан-хьафиз хьуьжар Нови Пазар гIалахь яр», – билгалдаьккхина оцу хаамехь.
I-В.Ниязовс хаамехь аьллачунна тIетоьхна: «Сербин бусалбанаш сатийсамца хьуьйсу шайн нохчийн вежарий болчу агIор. Цара цкъа хьалха саьлнашкара гIаттийра шайн республика, хIинца гIо до кхечу мехкашкахь дин чIагIдан».
2011-чу шарахь бахархой багарбаран хаамашца нийса а догIуш, Рашски областехь бехаш болчу бахархошна юкъахь 82 процент бусалбанаш бу.
ТIаьхьарчу шерашкахь цара леррина тидам тIебохуьйту тIекхуьуш йолу къона тIаьхье ийманехь кхетош-кхиорна.
Д.АНАДЕВ
№50, мангалан (июль) беттан 3-гIа де