Вайн республикин Куьйгалхочо Кадыров Рамзана а, Правительствос а шен хаддазчу тергонехь латточу а, цуьнан сагатдечу гIуллакхех цхьаъ а ду белхазалла лахъярца доьзна дерг. Оцу декъехь денна беш болх бу.
Хууш ма-хиллара, коронавирусан ун даржарца доьзна Нохчийчохь хаъал лакхабаьллера белхазаллин барам.
Иза лахбаран декъехь деш долчу хьекъалечу гIуллакхаша хIинцале а дика жамIаш делла. Белхан керла меттигаш ю, денна бохург санна, вайн пачхьенехь а, гIаланашкахь а, кIошташкахь а кхуллуш.
Мохк а, экономика а кхиоран, махлелоран министра Сатуев Бехкана дийцарехь, билгалдеш ду герггарчу хенахь Нохчийчохь кхин а 13 эзар белхан керла меттиг кхоллар.
«Карарчу хенахь кхочушъеш ю 624 инвестицийн проект. Церан юкъара мах 126,47 миллиард сом бу. Билгалдеш ду 13 286 белхан керла меттиг кхоллар», – элира министра.
Оцу проектан уггаре а яккхийчарах ю, Б.Сатуевс дийцарехь, дуккха а хьашташ кхочушдеш йолу «Ахмат Тавер» комплекс, махлелоран – дуккха а хьашташ кхочушдаран «Минутка» комплекс, Соьлжа-ГIалин дуьненаюкъара университет, инновацин гIишлошъяран «Казбек» технопарк, кхиерш.
ХIинцале а кхочушйина яьллачу яккхийчу проектех цхьаъ ю махлелоран-самукъадаккхаран «Грозный Молл» туш. Иза схьайиллира Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин 70 шо кхочучу деношкахь.
Даздаран хьолехь иза схьайоьллучохь дакъалецира Нохчийн Республикин Куьйгалхочо Кадыров Рамзана а.
И туш схьаелларх боккха кхаъ хилла соьлжагIалахошна санна, Нохчийчоьнан берриге а бахархошна а. Цу чохь масех бIе стагана болх бан керла меттигаш хилла хIинцале а.
«Грозный Молл» туьшана Россин рекордийн книгин сертификат делла. Дуьненахь уггаре а боккха, 18 450 кв. метр архитектурин седа барна а, ткъа иштта, бархI са болчу седанан суьртехь тхов барна а.
Махлелоран-самукъадаккхаран туьшана «А» классехь «Махлелоран туьшан тоьлла проект номинацехь хьалхара меттиг елла, иштта «Arendator Awards – 2020» федеральни совгIат (преми) делла.
Белхазалла лахъярехь хIокху шарахь яьккхина уггаре а мехала гIулч ю иза. Оцу декъехь белхаш бар хIора дийнахь дIахьош ду республикин куьйгаллин тIедилларца а, семачу тергонца а.
Цундела, вайн цхьана а кепара шеко яц, герггарчу хенахь, Нохчийчуьрчу кхин 13 эзар стагана болх бан керла меттигаш хирг хиларх.
Хь.САИДОВ
№65, хьаьттан (август) беттан 28-гIа де