Соьлжа-ГIалахь Къилбаседа Кавказан федеральни округехь Россин Президентан векалан заместитель Куренный Александр коьртехь волуш Кхеташо дIаяьхьира.
Кхеташонехь дакъалоцуш вара республикин Чоьхьарчу гIуллакхийн министр Алханов Руслан, Россин МЧС-н республикехула йолчу коьртачу урхаллин хьаькаман заместитель Амаев Джамбулат, Росгвардин Урхаллин регионерчу долахь йолчу составаца болх барехула йолчу отделенин хьаькаман гIоьнча Исламов Вахарсолта, бакъонашларъяран органийн а, ведомствийн а векалш.
Дакъалацархоша дийцаре дира хIокху шеран товбецан (сентябрь) беттан 17–19-чуй деношкахь Цхьааллин кхажтасаран де дIадахьарца доьзна, бакъонашларъяран органийн белхахоша дакъалоцуш, дIадахьа лерина вовшахтохаран-техникин гIуллакхаш.
«Росгвардин Нохчийн Республикехула йолчу урхаллин белхахой кийча бу кхажтасаран каппашкахь йолчу чоьнашка хьовса. Цара толлур ду кхерамазаллин техникин гIирсаш, регионехь Цхьааллин кхажтасаран денна кечамбарна а, и де дIадахьарна а юкъараллин низам а, юкъараллин кхерамазалла а лардар. Меттигехь урхалла даран органашца болх цхьаьна дIабахьар нисдина», – элира В.Исламовс.
Ерригроссехь дIадахьа леринчу Цхьааллин кхажтасаран дийнахь кхерамазалла ларъярхьама ведомствоша вовшашца латто еза зIенаш, дерриге а гIуллакхаш довзийтира кхеташонехь.
№66, товбецан (сентябрь) беттан 1-ра де