ТIеман халонаш хьегна долчу вайн къомана чIогIа мехала бу лоьраш… ХIунда аьлча, дуккха а адам цомгаш ду вайн. Царна юкъахь бу кегийнах а, бераш а. Цундела, адамийн могашалла Iалашъяран декъехь говза лоьраш ца хилча йиш яц. Буй-те вайн махкахь, шайн болх дика бевзаш а, беш а лоьраш? И тайпа хаттар кхолладелча, цунна жоп хилла лаьтташ дуккха а бу вайн республикехь лоьраш.
Масала, церан могIарехь ву ала хьакъ ву Шелан кIоштан больницехь массаж еш волу Генжибаев Жалавди. БIаьрса ледара долуш ву и. Цо дийцарехь, шо-ши шо долуш бер хилла иза бIаьрса галдолуш. Шен бIаьргаш дика са гуш бацара аьлла ца Iаш, адамашна ша пайдехь хилийтаран Iалашонца 2005-чу шарахь Кисловодск гIаларчу колледжехь, массаж ян а, цуьнан бакъонаш а Iамош дийшира больницехь цо. Цигахь кхаа шарахь дешна а ваьлла, 2008-чу шарахь веара иза Шеларчу больницехь болх бан. Йоццачу хенахь шен болх дика кара а бирзира цунна.
«Дийцахь, Жалавди, муха нисделира хьан дахарехь хIара говзалла караерзор? ХIун дара кху балхах хьан дог латийтинарг?», – аьлла, шега динчу хаттаршна жоьпаш а луш, цо дийцира: «Суна уггаре а хьалха лууш дерг – нахана сайх жимма а пайда хилийтар дара. Оцу Iалашонца кху хене схьа а кхаьчна со».
Дуккха а нах бу Генжибаев Жалавдига массаж яйта лелаш. Бераш далош зударий а богIу цунна тIе, иштта – бакхийнаш а.
Массажаш тайп-тайпана ю. Адаман цамгаре хьаьжжина ян езаш ю иза. Меже кагъелла волчунна шатайпа, дегI лозуш хилча – кхечу кепара. Массаж яран болх ца бевзачо, иза ян-м суна а хуур дара», олу, – дуьйцура Жалавдис. Иштта, цо билгалдаьккхира, ша хIинца а хаарш лакхадаха кест-кеста махкал арахьа воьдуш хилар.
МАТАГОВ Исхан
№ 66, шинара, 16 июнь, 2015 шо