Нохчийн Республикин Куьйгалхочо Кадыров Рамзана кхеташо дIаяьхьира министрийн кабинетан декъашхошца. Цигахь дийцаре дира регионан Правительствехь хийцамаш баран хьокъехь долу гIуллакхаш.
Нохчийн Республикин Правительствон Председатела Хучиев Муслима бовзийтира тайп-тайпанчу даржашка хьалхатоттуш болу нах а, ткъа иштта, правительствон структурехь бан лерина хийцамаш а.
Кадыров Рамзана къобалдира керла ши ведомство – кегийрхойн гIуллакхашкахула министерство а, физически культурин а, спортан а министерство а кхоллар. Хьалхарчу министерствона коьрте – Ибрагимов Iийса, шолгIачу министерствона коьрте Дадаев Муса хIоттийна.
Цул сов, республикин культурин министр хIоттийна Кадырова Iайшат. Ткъа бахамаллин а, лаьттан а юкъаметтигийн министран даржехь чIагIвина Ибрагимов Турпал-Iела.
Цуьнца цхьаьна, Россин Пачхьалкхан Думин депутат хилла Селимханов Мохьмад вице-премьер а, мохк а, экономика а кхиоран, махлелоран министр хIоттийна.
Иштта, социальни гIуллакхашкахула вице-премьер хIоттийна Дааев Хож-Бауди. Хьалха а санна, финансийн министерствона куьйгалла дийр ду Тагаев Султана.
Кадыров Рамзана Правительствон керла декъашхой декъал а бира, царна хьалха цхьамогIа декхарш а хIиттийра, экономика а, социальни дакъа а тешам боллуш кхиорна кхачоярца доьзна долу.
Цо иштта дIахаийтира шайна белла тешам цара ларбийриг хиларх ша тешна хилар.
«Экономикехь а, социальни декъехь а долу хьал Россехь, дерриге а дуьненахь а санна, сиха хийцалуш ду. Замано хьалхахIиттош долу муьлхха а декхарш сихха кхочушдан кийча хила деза вай. Вайна хьалхалаьтташ вуно чолхе а, жоьпалле а декхарш ду. Коьртачарах цхьаъ ду экономика тешам боллуш кхиор. Лаьа шун аьтто хуьлийла. Тешна ву халкъан сатийсам аш кхочушбийриг хиларх», – элира цо.
Иштта, Кадыров Рамзана кхеташонехь вовзийтира юкъараллин а, экономикин а кхерамзаллин Советан председателан керла заместитель Усмаев Вахит.
Нохчийчоьнан Куьйгалхочо хьалхара декхар тIе а диллира цунна оццу кхеташонехь – республикин хьуьнан бахамца тIаламе юкъаметтиг хилийтарца доьзна долчу гIуллакхашна тIехь леррина терго латтор.
Цу тIехь кхеташоно шен болх чекхбаьккхира.
Д.ПАШАЕВ
№78, эсаран (октябрь) беттан 13-гӀа де