Нохчийн Республикин Куьйгалхочо Кадыров Рамзана дакъалецира Меликов Сергей Дагестанан Куьйгалхочун дарже хӀоттарна леринчу даздаршкахь.
Шен къамелехь цо билгалдаьккхира цуьнан а, Дагестанан дерриге а халкъан а кхиамаш а, аьтто а хуьлийла шена лууш хилар.
«Суна чӀогӀа тамехь ду тахана хӀокху мехалчу гIуллакхца доьзна сий-ларамечу Дагестан халкъана а, хьешашна а хьалха къамел дар. Со тешна ву Дагестанан дерриге а халкъан тахана регионан куьйгалхочуьнца боккха аьтто хилла хиларх, ткъа Сергей Алимовичан, шен рогӀехь, аьтто хуьлийла массо а декъехь исбаьхьа йолчу республикин куьйгалхо хиларца », – элира цо.
Иштта, Р.Кадыровс билгалъехира Меликов Сергейн корматаллин а, гӀуллакхаллин а дика агӀонаш. Дагестан Республикин керлачу Куьйгалхочо Россин Президентан Путин Владимиран а, Дагестанан халкъан а тешам ларбийриг хиларх ша тешна хилар а хаийтира цо.
«Дукха хан ю суна Сергей Алимович вевза. Нохчийн Республикехь цо гIуллакх дечу хенахь вевзина суна иза, оьзда, хьанал эпсар а, стаг а санна. ТIаьхьа, Россин Президентан Къилбаседа Кавказехь юьззина бакъонаш йолу векал волчу хенахь, цо кхиамца кхочушдора округан экономика а, социальни дакъа а кхиоран гIуллакхаш. Цу тайппана доккха зеделларг а, таронаш а йолчу Сергей Алимовичан боккха аьтто бу республикин дахаран дерриге а дакъошкахь дика кхиамаш баха», – билгалдаьккхира Р.Кадыровс.
Нохчийчоьнан Куьйгалхочо тидам тIебахийтира Нохчийчоьнан а, Дагестанан а халкъаш даима а вовшашца вежараллин ондда доттагIалла хилла хиларца цIеяхана хиларна.
«Милла а вай дIасакъасто гIиртинехь а, вай даима хила а хилла, дан а ду, хир а ду вежараллин халкъаш, юкъара цхьа истори а, культура а йолуш», – элира цо.
Кадыров Рамзана аьлла ма-хиллара, нохчаша даима а лаккхара мах хадийна дагестанхойн бусалба динца йолчу дикачу юкъаметтиган.
«Суна дагадогIу тхан дайша а, дедайша а ДегIастанан исбаьхьачу мехкан мел боккха сий-ларам бора, дагестанхоша бусалба дин лелоран мел лаккхара мах хадабора, Мухьаммад Пайхамаран (Делера салам-маршалла хуьлда цунна) шовзткъа асхьаб дIавоьллинчу кешнашкахь цара зерат дар. Селхана хилча санна ду-кх иза, Нохчийчохь цхьацца бахьанашца, цхьа а маьждиг доцчу хенахь, нохчий Дагестанерчу маьждигашка рузбанан ламазаш дан лелара. Суна дагайогIу сан деда а, да а рузбанан ламазера, воккхавеш, юьхьа тIехь белар долуш, шайн доттагIий гарх кхаъ хилла цIа ихна хан», – бохура цо.
Нохчийн Республикин Куьйгалхочуьнца цхьаьна оцу даздаршкахь дакъалецира Россин Президентан Къилбаседа Кавказан федеральни округехь юьззина бакъонаш йолчу векала Чайка Юрийс а, округерчу кхечу субъектийн куьйгалхоша а.
Д.АНАДЕВ
№79, эсаран (октябрь) беттан 16-гӀа де