Нохчийн Республикин Куьйгалхочо Кадыров Рамзана теллира Устрада-ГIаларчу физически а, реабилитацин а медицинин инновационни туьшан болх. Оцу учрежденин куьйгалхочуьнца Ахмадов Аптица цхьаьна иза хьаьжира дархошна кхоьллинчу хьелашка, шена вакуумни терапи а яйтира.
А.Ахмадовс республикин Куьйгалхочунна бовзийтира реабилитацин туьшан балхахь болу коьрта кхиамаш.
Ша аьлча, цо билгалдаьккхира учреждени дуьненан кхузаманахьлерчу лехамашна а, стандарташна а жоп луш хилар, дархойн медицинин хьашташ уггаре а лакхарчу тIегIанехь кхочушдеш хилар.
«Оха жигара цхьаьна гIуллакхаш до немцойн цIеяхханчу говзанчашца, организм къонъярна тIехьажийна цаьрца цхьаьна тайп-тайпана программаш кхочушйо. Цуьнца цхьаьна Туьшо реабилитацин а, медицинин а цхьамогIа хьашташ кхочушдо хала цамгарш текхна, чолхе операцеш йина болчу дархойн а, ткъа иштта заьIапхойн а», – бохура А.Ахмадовс.
Цо дийцарехь, хIокху туьшахь дархойн аьтто бу вакуумни интервальни терапин (VACUMED) физиотерапин аппаратах а, OXYTERRA аппаратах а пайдаэца.
Р.Кадыровс шена тIехь зийра VACUMED аппарат. Иза чIогIа реза а хилира йинчу процедурина. Иштта, цо мах хадийра Туьшан керт-ков куьце ялош бинчу белхан.
Кхузахь дархошна вуно дика хьелаш кхоьллина могашалла меттахIотторна. Соьналла а йолуш, садаIа йоккха меттиг ю. Кхузахь чухчари а, айма а, ур-атталла зоопарк а-м дера ю.
Республикин Куьйгалхочо билгалдаьккхира медицинин долахь сектор кхиорна регионехь дерриге а хьелаш кхуллуш хилар.
Цо аьлла ма-хиллара, оцу балхо таро лур ю медицинин пачхьалкхан учрежденийн болх аттачу баккха а, могашаллаIалашъяран декъехь беркате конкуренци хилийта а.
Кадыров Рамзана баркалла элира Ахмадов Аптина болх дика а, эвсаре а барна.
Билгалдаккха деза физически а, реабилитацин а медицинин инновационни туьшахь дархойн УВЧ-терапи, магнитотерапи, физиотерапи яйта, массаж яйта, кхидолу хьашташ кхочушдайта аьтто хилар.
Учреждени административни, дIабийшаран, медицинин блокех, ткъа иштта кхача буучу чоьнах, садаIаран меттигах лаьтташ ю.
Санаторни-курортан дарбанаш дарна юкъадогIу кхузахь Iар, дукхазза кхача баар, могашалла меттахIотторан, реабилитацин курсаш дIаяхьар, культурин-садаIаран гIуллакхаш кхочушдар.
Д.ПАШАЕВ
№84, лахьанан (ноябрь) беттан 3-гӀа де