Нохчийн Республикин гӀишлошъяран а, хӀусамийн-коммунальни бахаман а министерствос тIаьхьарчу шерашкахь дуккха а керла школаш а, берийн бошмаш а, иштта, кхийолу социальни объекташ а йина, хIинца еш а ю. Бераш алсамдовларца доьзна ду школашкахь кхаа рожехь долу дешаран гIуллакх.
Цул сов, цхьаццанхьа школин гӀишлош тишъелла, мохкбегийча тIекхетарна кхераме а ю. Цундела, хӀоьттинчу хьоле хьаьжжина, БоргӀанехь керла школа ю еш. Хьалха школа лаьттинчу майданахь еш ю иза.
Говзанчаша дийцарехь, шира школа дӀаяккхаран бахьана ду цуьнан сейсмочӀагӀалла лахъялар.
Кхо гӀатт а долуш, 360 дешархочунна меттиг йолуш ю иза. Керлачу школехь кхузаманахьлерчу лехамашца догӀуш долу хьелаш кхуллур ду. Классашкахь, предметашка хьаьжжина, дешаран берриге а гIирсашца кхачо йийр ю.
Цул сов, школехь актови зал а, ешаран чоь а, библиотека а, кхачабааран чоь а, спортан зал а йийр ю.
Дешаран учреждени яр дIахьош ду Федеральни Ӏалашонийн «Россин Федерацин мохкбегорна кхерам болчу меттигашкахь цӀенойн а, объектийн а, Ӏер-дахаран системийн а чӀагӀалла лакхаяккхар» программин гурашкахь.
ТӀедогӀучу 2022-чу шеран хьалхарчу чийрикехь йина яьлла хила езаш ю школа. Иштта, кхин цхьа школа а ю Хьалха-Мартан кӀоштарчу Гихтахь еш.
14 эзар сов стаг ву цигахь Iаш. Пхи школа ю юьртахь, 3 407 дешархо а ву. Делахь а уьш кхачаме яц. Бахархой алсамбовларца а, юрт шоръяларца а доьзна ду и хьал.
Оцу бахьанашца, къоман «Дешар» проектан гурашкахь, юьртахь керла школа ю еш.
Кхо гIатт а долуш, 600 дешархочунна меттиг йолуш еш йолчу керлачу школехь кхузаманахьлерчу лехамашца догӀуш долу хьелаш кхуллур ду.
Классашкахь, предметашка хьаьжжина, дешаран берриге а гIирсашца кхачо йийр ю.
Цул сов, школехь актови зал а, ешаран чоь а, библиотека а, кхачабааран чоь а, йоккха спортан зал а хир ю. УьйтӀе а, кетӀе а, гонахара майда а тойина. ГIишлоно дIалоцург 15 000 квадратан метр хир ю.
Чуьра белхаш бу гӀишлошъярхоша дӀахьош, бовла гергабахана уьш. Карара 2021-гӀа шо чекхдалале йина яла езаш ю школа.
Балхана тӀехь терго латтош ю НР-н гӀишлошъяран а, хӀусамийн-коммунальни бахаман а министерство.
А.АБУЕВ
№85, лахьанан (ноябрь) беттан 6-гӀа де