Россехь бахархоша къайлаха болх бар лахдаран план чӀагӀйина Къинхьегаман рынок меттахӀотторехула йолчу белхан тобано. И план 2022–2024-чуй шерашна лерина йу. Россин вице-премьеран Голикова Татьянин секретариатана тӀе а тийжаш, оцу хьокъехь хаам бинарг ТАСС йу.
«Россин Президентан тӀедилларца Минтрудо кечйина план белхан тобанан кхеташонехь чӀагӀйина», – билгалдаьккхина секретариатехь.
Лакхахь билгал ма-даккхара, и план 2022–2024-чуй шерашна лерина йу.
«ТӀеэцначу сацамашца нийса а догӀуш, регионашна болу Ӏалашонан гайтамаш а, методикин магораш а 2022-чу шеран кхолламан (январь) баттахь чӀагӀдан билгалдеш ду. Къайлаха болх барца къийсам латторан регионийн планаш кечйар а, чӀагӀйар а 2022-чу шеран йуьххьехь дӀадахьа билгалдеш ду», – элира секретариатехь.
Хаамехь билгалдоккхуш ду ведомствошна йукъарчу белхан тобанан дакъалацархоша чиллин (февраль) беттахь дуьйна регионийн белхийн планашка хьажар дӀадолор ду, 2021-чу шарахь белхазалла лахйаран алапашца уьш йуста а йустуш.
«Къайлаха болх бар» кхетам билгалбаккхаран законан проект кечйина хила йезаш йу 2022-чу шеран хьалхара ахшо чекхдалале. Проекта тӀехь къахьоьгур ду Генеральни прокуратуро, МВД-с, Къинхьегаман министерствос, Федеральни налогови службо, Рострудо, регионаша, федеральни округийн векалша, социальни белхахоша», – тӀетуьйхира секретариатехь.
А.КАНТАЕВ
№6, кхолламан (январь) беттан 26-гӀа де