Соьлжа-ГIалин мэрин Дешаран департаменто дIахьош йу пачхьенерчу школийн хьехархошна йукъахь «Къона хьехархо – 2022» конкурс. Цигахь дакъалоцуш ву 34 хьехархо.
Конкурс шина декъах лаьтташ йу… Хьалхарчу «Дешаран дарс» декъехь хьехархоша шайн предметан йиллина дарс дIахьо кхечу школин дешархошца.
Конкурсан лерринчу комиссин декъашхой а бу, ца бевзачу дешархошна воха а ца вухуш, хьехархочо дарс даларан хьесап деш.
«Къона хьехархо» конкурс 2016-чу шарахь дуьйна дIахьош йу. ХIинццалц конкурсехь дакъалаца йиш йара 5 шеран белхан стаж йолчу хьехархочун. Амма, хӀокху шарахь хийцамаш бина — хьехархо школе балха веанчу хьалхарчу шарахь дуьйна конкурсехь дакъалаца бакъо йолуш ву. Цо таро ло, хьалхарчу шарахь дуьйна, шайн говзаллин хьуьнарш довзийта а.
– Ца бевза дешархой, ца йевза класс, тIехьарчу партанаш тIехь Iа комиссин декъашхой… Оцо мелла а садуура. Амма, ас дарс дала дезачу классера бераш дика доьшуш дара. Тхуна дукха сиха карийра йукъара мотт. Кхерар дIаделира, сапаргIатделира, иштта, ас хоьттуш, цара жоьпаш луш дIадоладелира тхан дарс. Керла тема хьеха а ларийра со. Цхьа а минот эрна ца йохуьйтуш дIадахара дарс, – дуьйцу Соьлжа-ГIаларчу Хь.Ибрагимовн цIарахчу математикин школин дешархошца дарс дIадаьхьначу Н.Назарбаевн цIарахчу №1 йолчу лицейн оьрсийн меттан а, литературин а хьехархочо, конкуран дакъалацархочо Гехаева Сацитас.
Хьалхарчу декъехь дакъалоцучу 34 хьехархочух 11 хьехархо къастор ву шолгIачу декъехь дакъацала.
Царна йукъахь билгалвоккхур ву толамхо.
ДУТУЕВА Макка
№12, чиллин (февраль) беттан 16-гӀа де