ХӀокху деношкахь Нохчийн Республикин культурин министерствехь кхеташо хилира. Иза лерина йара 2022-чу шарахь республикин «Синмехаллаш» фестиваль-конкурс дӀайахьарца доьзна долу гӀуллакхаш дийцаре дарна.
Министерствон куьйгалла тешна ду «Синмехаллаш» проект хӀокху шарахь кхин а чулацаме а, нахана дагахь лаьттачу агӀор къегина а хирг хиларх.
Кхеташонехь дакъалоцуш бара Культурин министерствон муниципальни урхаллийн дакъойн куьйгалхой, фестиваль-конкурсан вовшахтохараллин комитетан а, жюрин а декъашхой.
Проект кхочушйарх лаьцна дуьйцуш билгалйелира конкурсан хьалхара мур дӀабахьаран хан а, меттиг а, номинацешкахь бина хийцамаш а. 2022-чу шарахь конкурсан керла баннерш хир йу.
Проектан дакъалацархоша командашна йукъахь кхаж тесира, хан билгалйаьккхира. Иштта, конкурс асаран (июнь) беттан 7-чу дийнахь йолалур йу.
Кхеташонан дакъалацархойн сацам хилла Нохчийн Республикин йукъарчу дешаран школашкарчу кегийрхошна йукъахь болх дӀабахьа, вуьшта аьлча, дешархоша хьажархойн могӀаршкахь дакъалоцур ду.
Иштта, конкурсан вовшахтохараллин комитетан а, жюрин а декъашхоша дакъа а лоцуш, ток-шоуш дӀайахьа а лерина.
Конкурсан муьраш дӀабахьаран майданаш билгалйеш болх дӀабахьа безаш хиларх лаьцна а дийцира.
«Синмехаллаш» проекто нохчийн халкъан уггаре оьзда, хаза гӀиллакхаш, ламасташ довзуьйту. Нохчийн халкъан культурин хазна оцу мехаллех лаьтташ йу.
И телепроект лерина йу халкъан кхолларалла кхиорна а, Ӏалашйарна а, нохчийн къоман культура йоккхачу аудиторина дӀайовзийтарна а. Нохчийн къоман гӀиллакхийн а, бусалба динан а баххашна тӀехь лаьтташ йолу нохчалла йовзийтар йу проектан Ӏалашо. ТӀекхуьу къона чкъор ийманехь кхетош-кхиорехь доккха маьӀна леладо цо.
Проект кху тӀаьхьарчу шерашкахь къоман «Культура» проектан кхочушйаран гурашкахь дӀахьош йолу регионан «Нохчийн Республикин кхоллараллин нах» проект йу.
З.ЭЛЬДЕРХАНОВА
№25, оханан (апрель) беттан 2-гӀа де